ദളിത് സ്ത്രീകള്‍ക്കെതിരെ അവഹേളനം : ബ്ലോക്ക് പഞ്ചായത്ത് പുറത്തിറക്കിയ ' മണ്ണാര്‍ക്കാടിന്റെ ചരിത്ര പെരുമ ' പിന്‍വലിക്കണമെന്നാവശ്യം.

മണ്ണാര്‍ക്കാടിന്റെ ചരിത്ര പെരുമ എന്ന പേരില്‍ ബ്ലോക്ക് പഞ്ചായത്ത് പുറത്തിറക്കിയ പുസ്തകം പിന്‍വലിക്കണമെന്ന ആവശ്യവുമായി ഭാരതീയ ദളിത് കോണ്‍ഗ്രസ്സ് (എം). പുസ്തകത്തില്‍ ദളിത് സ്ത്രീകളെ അവഹേളിക്കുന്നതായി സംഘടന ചൂണ്ടിക്കാണിക്കുന്നു. പുസ്തകത്തിലെ 89 ാം പേജില്‍ മേല്‍മുണ്ട് ധരിക്കാത്ത സ്ത്രീയുടെ ചിത്രം പ്രസിദ്ധീകരിച്ചതാണ് സംഘടന അവഹേളനമായി ഉയര്‍ത്തിക്കാണിക്കുന്നത്. പുസ്തകത്തിലെ 'വേഷം' എന്ന ശീര്‍ഷകത്തിന് കീഴിലാണ് ഈ ചിത്രം പ്രസിദ്ധീകരിച്ചിട്ടുള്ളത്. ഈ പേജില്‍ തന്നെ 'സവര്‍ണ്ണ വിഭാഗത്തില്‍പ്പെട്ടവര്‍ മാത്രമാണ് മേല്‍മുണ്ട് ഉപയോഗിച്ച് ശരീരം മറച്ചത് ' എന്നും രേഖപ്പെടുത്തിയിട്ടുണ്ട്. ചിത്രം പ്രസിദ്ധീകരിച്ചത് ദളിത് പീഡന നിരോധന നിയമപ്രകാരം കുറ്റകരമാണ്. അതിനാല്‍ അധികൃതര്‍ പുസ്തകം പിന്‍വലിച്ച് പൊതു സമൂഹത്തോട് മാപ്പ് പറയണമെന്ന് സംഘടന ആവശ്യപ്പെട്ടു. അല്ലാത്ത പക്ഷം നിയമ നടപടി സ്വീകരിക്കുമെന്നും ദേശീയ സംസ്ഥാന പട്ടികജാതി പട്ടിക വര്‍ഗ്ഗ കമ്മീഷനുകളെ പരാതിയുമായി സമീപിക്കുമെന്നും നേതാക്കള്‍ പത്രകുറിപ്പിലൂടെ അറിയിച്ചു. പൊതുഫണ്ടുപയോഗിച്ച് നടത്തിയ ഈ പ്രവര്‍ത്തി പൊതുസമൂഹത്തെ അറിയിക്കുന്നതിന് ബ്ലോക്ക് പഞ്ചായത്തിലേക്ക് ദളിത് മാര്‍ച്ച് നടത്തുമെന്നും പ്രസിഡന്റ് ആര്‍.മണി അറിയിച്ചു.

News

സംസ്ഥാന പുരസ്‌കാര ജേതാവ് സ്മിജിത്ത് കുമാറിനെ മണ്ണാര്‍ക്കാട് ഡെക്കലോഗ് ഫിലിം സൊസൈറ്റി ആദരിച്ചു.

ചലചിത്ര രംഗത്ത് സംസ്ഥാന പുരസ്ക്കാരം ലഭിച്ച സ്മിജിത്ത് കുമാറിനെ ഫിലിം സൊസൈറ്റി ആദരിച്ചു. താലൂക്ക് റഫറൻസ് ലൈബ്രറി ഫിലീം ക്ലബായ ഡെക്കലോഗ് ഫിലീം സൊസൈറ്റിയാണ് പരിപാടി സംഘടിപ്പിച്ചത്. അരകുർശി റോട്ടിലെ കമ്മ്യൂണിറ്റി ഹാളിലാണ് അനുമോദന സദസ്സ് നടന്നത്. വൈകിട്ട് അഞ്ചു മണിയോടെ ആരംഭിച്ച ചടങ്ങ് മണ്ണാർക്കാട് നഗരസഭ വൈസ് ചെയർമാൻ ടി.ആർ.സെബാസ്റ്റ്യൻ ഉദ്ഘാടനം ചെയ്തു. മനുഷ്യർ തമ്മിൽ സംവദിക്കുന്നതിന്റെ കൃത്രിമമില്ലാത്ത അവസ്ഥ സിനിമയിൽ സൃഷ്ടിക്കപ്പെടുന്നത് കൊണ്ടാണ് ഇത്തരം ചടങ്ങുകൾക്ക് വേദിയൊരുങ്ങുന്നതെന്ന് സെബാസ്റ്റ്യൻ അഭിപ്രായപ്പെട്ടു. മികച്ച സിങ്ക് സൗണ്ട് റെക്കോർഡിങ്ങിനാണ് 2017 ലെ സംസ്ഥാന പുരസ്ക്കാരം സ്മിജിത്ത് കുമാറിന് ലഭിച്ചത്. ചടങ്ങിൽ പ്രശസ്ത സിനിമ നിരൂപകൻ ജി.പി.രാമചന്ദ്രൻ അദ്ദേഹത്തിന് ഫിലിം സൊസൈറ്റിയുടെ പുരസ്ക്കാരം നൽകി ആദരിച്ചു. ഭാരവാഹികളായ അച്ചുതനുണ്ണി, പി.എൻ.മോഹനൻ, രമേശൻ തുടങ്ങിയവർ പങ്കെടുത്തു.

ആൾ കേരള ഗ്രാമീൺ ഡാക് സേവക് യൂണിയൻ മണ്ണാർക്കാട് പോസ്റ്റോഫീസിലേക് പ്രകടനം നടത്തി.

മെയ്‌ ഇരുപത്തിരണ്ടിനു ഗ്രാമീൺ ഡാക് സേവക് ജീവനക്കാർ അനിശ്ചിതകാല പണിമുടക് സമരത്തിന് നേതൃത്വം നൽകി. ഇതിന്റെ ഭാഗമായി ആൾ കേരള ഗ്രാമീൺ ഡാക് സേവക് യൂണിയൻ ഒറ്റപ്പാലം ഡിവിഷൻ കമ്മിറ്റി മണ്ണാർക്കാട് പോസ്റ്റോഫീസിലേക് പ്രകടനം നടത്തി. പോസ്റ്റോഫീസ് പരിസരത്ത് സമാപിച്ച പ്രകടനം മുൻ ഡെപ്യൂട്ടി സ്പീക്കർ ജോസ് ബേബി ഉദ്‌ഘാടനം ചെയ്തു. കേന്ദ്രസർക്കാർ അതിന്റെ നാലാം വർഷം പൂർത്തീകരിക്കുന്ന വേളയിൽ പൊതുമേഖലാ സ്ഥാപനങ്ങൾ അടച്ചു പൂട്ടി സ്വകാര്യ വത്കരിക്കാനുള്ള നീക്കമാണ് നടപ്പാക്കുന്നത്. സാധാരണക്കാരുടെ തൊഴിൽപരമായ പ്രശ്നങ്ങൾ പരിഹരിക്കുന്നതിൽ കേന്ദ്ര സർക്കാർ അല്പം പോലും താല്പര്യം കാണിക്കുന്നില്ലെന്ന് ജോസ് ബേബി ഉദ്‌ഘാടന പ്രസംഗത്തിൽ പറഞ്ഞു. കമലേഷ് ചന്ദ്ര കമ്മീഷൻ റിപ്പോർട്ട്‌ നടപ്പിലാക്കുക, തുല്യ ജോലിക്ക് തുല്യ വേതനം നൽകുക എന്നീ ആവശ്യമാണ് സംഘടന മുന്നോട്ടു വെക്കുന്നത്. പ്രതിഷേധത്തിന്റെ ഭാഗമായി പ്രവർത്തകർ ഗാനാലാപനം നടത്തി. സംഘടന ഭാരവാഹികളായ ജയദേവൻ വിയ്യക്കുറിശി, ശ്രീധരൻ കണ്ടമംഗലം എന്നിവർ നേതിര്ത്വം നൽകി.

തപാല്‍ വകുപ്പ് ജീവനക്കാരുടെ അനിശ്ചിതകാല പണിമുടക്ക് : പോസ്റ്റ് ഓഫീസിന് മുന്നില്‍ ധര്‍ണ്ണ നടന്നു.

തപാൽ വകുപ്പ് ജീവനക്കാർ മെയ്‌ ഇരുപത്തിരണ്ടു മുതൽ അനിശ്ചിതകാല പണിമുടക്കിന് ആരംഭം കുറിച്ചു. ഇതിന്റെ ഭാഗമായി മണ്ണാർക്കാട് എൻ.എഫ്.പി.ജി.ഡി.എസ് യൂണിയന്റെ ആഭിമുഖ്യത്തിൽ പോസ്റ്റ്‌ ഓഫീസ് ധർണ്ണ നടത്തി. തപാൽ വകുപ്പിൽ പ്രവർത്തിക്കുന്ന തൊഴിലാളികളുടെ അവകാശങ്ങൾ സംരക്ഷിക്കപ്പെടണമെന്ന ആവശ്യമാണ് സംഘടനാ ഉയർത്തിപ്പിടിച്ചത്. കമലേഷ് ചന്ദ്രകമ്മറ്റി റിപ്പോർട്ടിലെ അനുകൂല ശുപാർശകൾ ഉടൻ നടപ്പിലാക്കുക,മെമ്പർ ഷിപ്പ് വെരിഫിക്കേഷൻ നടപടികൾ ഉടൻ പൂർത്തിയാക്കുക തുടങ്ങിയ ആവശ്യങ്ങളാണ് സംഘടന പ്രധാനമായും ഉയർത്തിപിടിക്കുന്നത്. നേതാക്കളായ വി.വി വേണുഗോപാലൻ, പി ബാലകൃഷ്ണൻ, കെ. കുമാരൻ, സി.പി പ്രഭാകരൻ എന്നിവർ പ്രതിഷേധ പ്രകടനത്തിൽ പങ്കെടുത്തു സംസാരിച്ചു.

വെള്ളവും വൈദ്യുതിയും ലഭ്യമായില്ല : പ്രവര്‍ത്തിക്കാനാവാതെ താലൂക്ക് ആശുപത്രിയിലെ ഡയാലിസിസ് യൂണിറ്റ്.

വൃക്ക രോഗികൾക്ക് സജ്ജമായി സാങ്കേതിക തടസ്സങ്ങളിൽപ്പെട്ട് താലൂക്ക് ആശുപത്രിയിലെ ഡയാലിസിസ് യൂണിറ്റ്. വെള്ളവും, വൈദ്യുതിയും ലഭിക്കാത്തതാണ് യൂണിറ്റിന്റെ ആരംഭത്തിന് കാലതാമസം സൃഷ്ടിക്കുന്നത്. 2017 അവസാനത്തോടെയാണ് സർക്കാർ വിവിധ പദ്ധതികൾക്കായി വിനിയോഗിക്കുന്ന ഫണ്ടായ കി ഫ്ബി യുടെ സഹായത്തോടു കൂടി താലൂക്ക് ആശുപത്രിയിൽ ഡയാലിസിസ് യൂണിറ്റിനുള്ള നടപടികൾ ആരംഭിച്ചത്. സംസ്ഥാന മെഡിക്കൽ സർവ്വീസസ് കോർപറേഷനാണ് ഇതിന് നേതൃത്വം നൽകിയത്. തുടർന്ന് 2018 ജനുവരിയോടെ യൂണിറ്റിന് വേണ്ട സാധന സാമഗ്രികൾ സജ്ജമായി. 8 പേർക്ക് ഡയാലിസിസ് നടത്താനുള്ള സംവിധാനം ആശുപത്രിയുടെ പഴയ ഓഫീസ് കെട്ടിടത്തിലാണ് ഒരുക്കിയിട്ടുള്ളത്. എന്നാൽ മാസങ്ങൾ കഴിഞ്ഞിട്ടും യൂണിറ്റ് പ്രവർത്തനം ആരംഭിച്ചിട്ടില്ല. പ്രവർത്തനത്തിന് ആവശ്യമായ ജലവും, വൈദ്യുതിയും ലഭിക്കാത്തതാണ് കാരണം. ഇത് സംബസിച്ച് എം.എൽ.എ.എൻ.ഷംസുദീന്റെ ശുപാർശയോടു കൂടിയുള്ള അപേക്ഷ ജില്ലാ കലക്ടർക്ക് നൽകിയിട്ടുണ്ട്. ജല ലഭ്യതയ്ക്കായി കുഴൽക്കിണർ കുഴിക്കണമെന്നതാണ് ആവശ്യമുള്ളത്. യൂണിറ്റിന്റെ പ്രവർത്തനം ആരംഭിക്കുമ്പോൾ വരുന്ന വൈദ്യുതിയരുടെ അധിക ഉപയോഗത്തിനായി ട്രാൻസ്ഫോർമർ സ്ഥാപിക്കണമെന്ന കെ.എസ്.ഇ.ബി യുടെ നിർദ്ദേശമാണ് അടുത്ത കടമ്പ. ഇതിനായി പത്തുലക്ഷം രൂപയാണ് ചിലവ് പ്രതീക്ഷിക്കുന്നത്. ഇത് മറ്റു മാർഗ്ഗങ്ങളില്ലെങ്കിൽ എം.എൽ.എ. ഫണ്ട് കടാക്ഷിക്കുമെന്ന വിശ്വാസത്തിലാണ് ആശുപത്രി അധികൃതർ.

District News

ഗവ.മെഡിക്കല്‍ കോളെജ് നിര്‍മാണ പ്രവര്‍ത്തനം വിലയിരുത്താന്‍ ത്രൈമാസം യോഗം വിളിക്കും - മന്ത്രി എ.കെ ബാലന്‍, 2019 ജൂണില്‍ പൂര്‍ത്തിയാക്കുമെന്ന് ഉദ്യോഗസ്ഥര്‍

പാലക്കാട് ഗവ.മെഡിക്കല്‍ കോളെജ് കെട്ടിടസമുച്ചയം കരാര്‍വ്യവസ്ഥ പ്രകാരം സമയബന്ധിതമായി പൂര്‍ത്തിയാക്കണമെന്നും അല്ലാത്തപക്ഷം ബന്ധപ്പെട്ട ഉദ്യോഗസ്ഥര്‍ക്ക് ശിക്ഷാ നടപടികള്‍ ഉണ്ടാകുമെന്നും മന്ത്രി എ.കെ ബാലന്‍ കര്‍ശന നിര്‍ദ്ദേശം നല്‍കി. 2019 ജൂണിലാണ് കരാര്‍ പ്രകാരം പണി പൂര്‍ത്തിയാക്കേണ്ടത്. ഇതിനായി സൂപ്രണ്ടിങ് എഞ്ചിനീയര്‍ ഓരോ മാസവും അവലോകനം നടത്തി നിര്‍മാണ പ്രവര്‍ത്തനം വിലയിരുത്തണമെന്നും ഓരോ മൂന്ന് മാസത്തിലും അവലോകനം നടക്കുമെന്നും മന്ത്രി പറഞ്ഞു. മെഡിക്കല്‍ കോളെജ് കെട്ടിടനിര്‍മാണപ്രവര്‍ത്തനങ്ങള്‍ നേരിട്ടെത്തി വിലയിരുത്തിയ ശേഷമുളള അവലോകനയോഗത്തിലാണ് മന്ത്രി ഇക്കാര്യം അറിയിച്ചത്. പൂര്‍ത്തിയാക്കേണ്ട ദിവസം വരെ ചെയ്യേണ്ട പ്രവര്‍ത്തനങ്ങള്‍ മുന്‍കൂട്ടി തയ്യാറാക്കി സര്‍ക്കാറിന് സമര്‍പ്പിക്കാനും ഉദ്യോഗസ്ഥര്‍ക്ക് മന്ത്രി നിര്‍ദ്ദേശം നല്‍കി. ഇന്ത്യന്‍ മെഡിക്കല്‍ കൗണ്‍സിലിന്റെ അംഗീകാരം കിട്ടാന്‍ സര്‍ക്കാര്‍ എല്ലാവിധ ശ്രമങ്ങളും തുടരുകയാണെന്നും അതിനായി മെഡിക്കല്‍ കോളെജിനായി പട്ടികജാതി-വര്‍ഗ്ഗ വകുപ്പിന്റെ ഫണ്ട് ഉപയോഗിച്ചുളള പ്രവര്‍ത്തനങ്ങള്‍ നടത്തി വരികയാണെന്നും മന്ത്രി പറഞ്ഞു. നിലവില്‍ 65000 സ്‌ക്വയര്‍ ഫീറ്റ് വിസ്തൃതിയുളള അക്കാദമിക്ക് ബ്ലോക്കിന്റെ നിര്‍മാണം പ്രവര്‍ത്തനം 12.60 കോടി ചെലവില്‍ 2014-ല്‍ പൂര്‍ത്തിയാക്കിയിട്ടുണ്ട്. 13 കോടി വീതം ചെലവില്‍ 2017-ല്‍ ആണ്‍കുട്ടികളുടെയും പെണ്‍കുട്ടികളുടേയും ഹോസ്റ്റലുകളും പൂര്‍്ത്തിയായിട്ടുണ്ട്. 26 ലക്ഷം ലിറ്റര്‍ ജലസംഭരണ ശേഷിയുളള ഭൂഗര്‍ഭ ടാങ്ക് നിര്‍മാണം 5.6 കോടി ചെലവില്‍ 2016-ല്‍ പൂര്‍ത്തിയായിട്ടുണ്ട്. ലെക്ച്ചറര്‍ ക്ലാസ്സ് റൂം, ലാബുകള്‍, പഠനക്ലാസ്സുകള്‍ എന്നിവ ഉള്‍പ്പെട്ട പ്രധാനകെട്ടിടത്തിന്റെ നിര്‍മാണം 2017 ഡിസംബറില്‍ പൂര്‍ത്തിയാക്കും. 32.66 കോടി ചെലവിലാണ് നിര്‍മാണം നടന്നു വരുന്നത്. 5.4 കോടിയുടെ അതിര്‍ത്തി മതിലുകളുടേയും ഗേയ്റ്റിന്‍േയും നിര്‍മാണം ജലസേചനവിഭാഗത്തിന്റെ സ്ഥലം ഉള്‍പ്പെട്ടു എന്ന കാരണത്താല്‍ ഹൈക്കോടതിയില്‍ കേസ് പരിഗണനയിലാണ്. ഇതില്‍ ജലസേചനവിഭാഗത്തിന്റെ സ്ഥലം ഒഴിവാക്കി നിര്‍മാണ പ്രവര്‍്ത്തനം നടത്താമെന്ന സത്യവാങ്മൂലം കോടതിയില്‍ സമര്‍പ്പിച്ച് പ്രവൃത്തി തുടരാന്‍ ശ്രമിക്കണമെന്ന് മന്ത്രി ഉദ്യോഗസ്ഥര്‍ക്ക് നിര്‍ദ്ദേശം നല്‍കി. 7.5 കോടി ചെലവില്‍ തുടങ്ങിവെച്ച ഇന്റേണല്‍ റോഡിന്റെ നിര്‍മാണം എല്ലാ നിര്‍മാണ പ്രവര്‍ത്തനങ്ങള്‍ക്കും ശേഷം പൂര്‍ത്തിയാക്കും. തുടര്‍ന്ന് വാര്‍ഡ്, ഓപ്പറേഷന്‍ തിയറ്റര്‍, ഐ.സി.യു എന്നിവ ഉള്‍പ്പെട്ട പ്രധാനകെട്ടിടത്തിന്റെ നിര്‍മാണം 2019 ജൂണില്‍ പൂര്‍ത്തിയാക്കുന്നതോടെ മെഡിക്കല്‍ കോളെജ് കെട്ടിട സമുച്ചയത്തിന്റെ നിര്‍മാണം പൂര്‍ണ്ണമാകും.പി.ഡബ്ള്‍.യൂ.ഡി കെട്ടിടവിഭാഗമാണ് നിര്‍മാണ പ്രവര്‍ത്തനം നടത്തുന്നത്. യോഗത്തില്‍ ഷാഫി പറമ്പില്‍ എം.എല്‍.എ, ഗവ.മെഡിക്കല്‍ കോളെജ് സ്പെഷ്ല്‍ ഓഫീസറും എസ് .സി എസ്. ടി വകുപ്പ് പ്രിന്‍സിപ്പല്‍ സെക്രട്ടറിയുമായ ഡോ.വേണു,മെഡിക്കല്‍ കോളെജ് വൈസ് പ്രിന്‍സിപ്പല്‍ ഡോ.എം.കെ രവീന്ദ്രന്‍ എന്നിവര്‍ പങ്കെടുത്തു.

മെഡിക്കല്‍ കോളെജ് വിദ്യാര്‍ഥികള്‍ക്കായി നാല് ദിവസം എട്ട് മുതല്‍ വൈകീട്ട് മൂന്ന് വരെ ഒ.പി നടത്താന്‍ തീരുമാനം

പാലക്കാട് ഗവ.മെഡിക്കല്‍ കോളെജ് വിദ്യാര്‍ഥികള്‍ക്കായി ജില്ലാ ആശുപത്രിയും ഗവ.മെഡിക്കല്‍ കോളെജും സംയുക്തമായി ആഴ്ച്ചയില്‍ നാല് ദിവസം നാല് യൂനിറ്റുകളായി വിഭജിച്ച് രാവിലെ എട്ട് മുതല്‍ വൈകീട്ട് മൂന്ന് വരെ ഒ.പി നടത്താന്‍ നിയമ-സാംസ്‌ക്കാരിക-പിന്നാക്കക്ഷേമ വകുപ്പ മന്ത്രി എ.കെ ബാലന്റെ അധ്യക്ഷതയില്‍ ചേര്‍ന്ന യോഗത്തില്‍ തീരുമാനമായി. പട്ടികജാതി വികസന വകുപ്പിന് കീഴിലുളള മെഡിക്കല്‍ കോളെജ് വിദ്യാര്‍ത്ഥികള്‍ ക്ലിനിക്കല്‍ വിഭാഗമായ ജില്ലാ ആശുപത്രിയില്‍ പ്രായോഗിക പരിശീലനത്തിന് കൂടുതല്‍ സൗകര്യം ഏര്‍പ്പെടുത്തണമെന്നാവശ്യപ്പെട്ട് നടത്തിയ സമരത്തെ തുടര്‍ന്നാണ് മന്ത്രിയുടെ അടിയന്തര ഇടപെടല്‍. എം.ബി.ബി.എസ് ബാച്ചുകളുടെ പഠനത്തിനായി ആഴ്ച്ചയില്‍ ഒരു ദിവസവും ഒന്നിടവിട്ട ശനിയാഴ്ച്ചകളിലുമായി നടന്നിരുന്ന ഒ.പി സൗകര്യം കൂടുതല്‍ ദിവസം സജ്ജമാക്കാനായിരുന്നു വിദ്യാര്‍ഥികളുടെ ആവശ്യം. വിവിധ മെഡിക്കല്‍ വിഭാഗങ്ങളായി വിഭജിച്ച് നടത്തുന്ന ഒ.പി മേല്‍നോട്ട ചുമതല ജില്ലാ ആശുപത്രി സൂപ്രണ്ടിനായിരിക്കും. ഇ.എന്‍.ടി വിഭാഗത്തില്‍ പഠനസൗകര്യത്തിനായി ജീവനക്കാരേയും ഉപകരണങ്ങളും ആരോഗ്യവകുപ്പ് സജ്ജമാക്കും. ജീവനക്കാര്‍ തികയാതെ വരുന്ന പക്ഷം ദേശീയ ആരോഗ്യദൗത്യവുമായി ബന്ധപ്പെട്ട് നിയമനം നടത്തും. ജില്ലാ ആശുപത്രിയിലെ അനസ്തേഷ്യ വിഭാഗത്തില്‍ അടിയന്തര സന്ദര്‍ഭങ്ങളില്‍ അനസ്തിസ്സ്റ്റിനെ ഗവ.മെഡിക്കല്‍ കോളെജ് ലഭ്യമാക്കണമെന്ന് മന്ത്രി നിര്‍ദ്ദേശിച്ചു. മെഡിക്കല്‍ കോളെജില്‍ നിലവില്‍ അഞ്ചും ജില്ലാ ആശുപത്രിയില്‍ മൂന്നും അനസ്തറ്റിസ്റ്റുകളാണ് ഉളളത്. പലപ്പോഴും ജില്ലാ ആശുപത്രിയില്‍ അനസ്തറ്റിസ്റ്റുകളുടെ കുറവ് അനുഭവപ്പെടുകയും രോഗികളെ മറ്റ് ആശുപത്രികളിലേക്കയക്കുകയും ചെയ്യേണ്ടി വരുന്ന സാഹചര്യത്തിലാണ് മന്ത്രിയുടെ സാന്നിധ്യത്തില്‍ തീരുമാനമുണ്ടായത്. ഗവ. മെഡിക്കല്‍ കോളെജുമായി ബന്ധപ്പെട്ട് സാങ്കേതികവും നിയമപരവുമായ വിവിധ പ്രശ്‌നങ്ങള്‍ സര്‍ക്കാര്‍ പരിഹരിച്ച് വരികയാണെന്നും കോളെജിന് മെഡിക്കല്‍ കൗണ്‍സില്‍ ഓഫ് ഇന്ത്യയുടെ അംഗീകാരത്തിനായി സര്‍ക്കാര്‍ ശ്രമിച്ചു വരികയാണെന്നും മന്ത്രി പറഞ്ഞു. അതുവഴി നിലവില്‍ പഠനം തുടരുന്ന കുട്ടികളുടെ പ്രവേശനം പരിരക്ഷിക്കുകയെന്ന കടമ കൂടി സര്‍ക്കാരിനുണ്ടെന്നും മന്ത്രി പറഞ്ഞു. പാലക്കാട് ഗവ.മെഡിക്കല്‍ കോളെജ് സൂപ്പര്‍ സ്പെഷാലിറ്റി സൗകര്യത്തോടെ മികച്ചതാക്കുകയാണ് സര്‍ക്കാര്‍ ലക്ഷ്യമെന്ന് മന്ത്രി അറിയിച്ചു. മെഡിക്കല്‍ കോളെജിന്റെ സുഗമമായ നടത്തിപ്പിന് ജില്ലാ ആശുപത്രി അധികൃതരും മെഡിക്കല്‍ കോളെജ് അധികൃതരുടേയും യോജിച്ചുളള പ്രവര്‍ത്തനം ആവശ്യമാണെന്നും മന്ത്രി വ്യക്തമാക്കി. യോഗത്തില്‍ ഷാഫി പറമ്പില്‍ എം.എല്‍.എ, ഗവ.മെഡിക്കല്‍ കോളെജ് സ്പെഷല്‍ ഓഫീസറും എസ് .സി എസ്. ടി വകുപ്പ് പ്രിന്‍സിപ്പല്‍ സെക്രട്ടറിയുമായ ഡോ.വേണു, ജില്ലാ ആശുപത്രി സൂപ്രണ്ട് ഡോ.രമാദേവി, ഡി.എം.ഒ ഡോ.കെ.പി റീത്ത, മെഡിക്കല്‍ കോളെജ് വൈസ് പ്രിന്‍സിപ്പല്‍ ഡോ.എം.കെ രവീന്ദ്രന്‍ എന്നിവര്‍ പങ്കെടുത്തു.

വന്യജീവി വാരാഘോഷം : സിവില്‍ സ്റ്റേഷന്‍ ജീവനക്കാര്‍ പ്രതിജ്ഞയെടുത്തു

സംസ്ഥാന വനം-വന്യജീവി വകുപ്പ് നടത്തുന്ന വന്യജീവി വാരാഘോഷത്തിന്റെ ഭാഗമായി സിവില്‍ സ്റ്റേഷനിലെ ജീവനക്കാര്‍ പ്രതിജ്ഞയെടുത്തു. ജില്ലാ കലക്റ്റര്‍ ഡോ:പി. സുരേഷ് ബാബു പ്രതിജ്ഞ ചൊല്ലിക്കൊടുത്തു. ഒക്ടോബര്‍ രണ്ട് മുതല്‍ എട്ടുവരെയാണ് എല്ലാ വര്‍ഷവും വന്യജീവി വാരാഘോഷം നടത്തുന്നത്. വന്യജീവി വാരാഘോഷത്തിന്റെ സന്ദേശം എല്ലാവരിലുമെത്തിക്കുന്നതിനാണ് വിദ്യാര്‍ഥികളും സര്‍ക്കാര്‍ ജീവനക്കാരും പ്രതിജ്ഞയെടുത്തത്.

പരുവാശ്ശേരിയിലെ ചാമപറമ്പ് കോളനി അംബേദ്കര്‍ മാതൃകാ കോളനിയാക്കും - മന്ത്രി എ.കെ ബാലന്‍

വടക്കഞ്ചേരി ഗ്രാമപഞ്ചായത്തിലെ ഒന്നാം വാര്‍ഡായ പരുവാശ്ശേരിയിലെ 52 പട്ടികജാതി കുടുംബങ്ങള്‍ ഉള്‍പ്പെട്ട ചാമപറമ്പ് കോളനിയില്‍ ഒരു കോടിയുടെ സമഗ്രവികസനപ്രവര്‍ത്തനങ്ങള്‍ നടപ്പാക്കി അംബേദ്കര്‍ മാതൃകാ കോളനിയാക്കുമെന്ന് പട്ടിക-പിന്നാക്കക്ഷേമ-നിയമ-സാംസ്‌കാരിക വകുപ്പ് മന്ത്രി എ.കെ.ബാലന്‍ പറഞ്ഞു. വാര്‍ഡിലെ കൂമാംക്കടവ്, , ചല്ലിപ്പറമ്പ്, കളത്തൊടി പട്ടികജാതി കോളനികളില്‍ പട്ടികജാതി വകുപ്പ് ഫണ്ടും തദ്ദേശസ്വയംഭരസ്ഥാപനങ്ങളുടെ ഗ്രാന്റ് -ഇന്‍-എയ്ഡ് ഉപയോഗിച്ചും വികസനപ്രവര്‍ത്തനങ്ങള്‍ നടപ്പാക്കും. ഗാന്ധിജയന്തി വാരത്തോടനുബന്ധിച്ച് നാല് പട്ടിക ജാതി കോളനികളെ മാതൃകാ കോളനികളാക്കി മാറ്റുന്ന പ്രവര്‍ത്തനങ്ങളുടെ പ്രഖ്യാപനം നിര്‍വഹിച്ച് സംസാരിക്കുകയാരുന്നു മന്ത്രി. മന്ത്രിസഭയുടെ ഒന്നാം വാര്‍ഷികത്തോടനുബന്ധിച്ച് ജില്ലാ ഇന്‍ഫര്‍മേഷന്‍ ഓഫീസ് ആവിഷ്‌കരിച്ച് നടപ്പാക്കുന്ന വാര്‍ഡ് ഒന്ന് പരുവാശ്ശേരി മാതൃകാ വാര്‍ഡ് പദ്ധതിയുടെ ഭാഗമായാണ് തുടര്‍ പ്രവര്‍ത്തനങ്ങള്‍ നടത്തുന്നത്.നിര്‍വഹണ ഏജന്‍സിയായി നിര്‍മിതിയെ ചുമതലപ്പെടുത്താനും ആറ് മാസത്തിനകം പ്രവൃത്തികള്‍ പൂര്‍ത്തിയാക്കാനും മന്ത്രി ജില്ലാ കലക്ടര്‍ക്ക്് നിര്‍ദ്ദേശം നല്‍കി.ജില്ലാ പട്ടികജാതി വികസന ഓഫീസര്‍ക്ക് ഏകോപന ചുമതലയും നല്‍കി. ഇത്തരത്തില്‍ എല്ലാ അസംബ്ലി മണ്ഡലങ്ങളിലും രണ്ട് വീതം കോളനികളെ തിരഞ്ഞടുത്ത് ഒരു കോളനിക്ക് ഒരു കോടി ചെലവഴിച്ച് വികസനപ്രവര്‍ത്തനങ്ങള്‍ നടത്തുന്നുണ്ട് . 140 മണ്ഡലങ്ങളിലെ 280 കോളനികളില്‍ ഇത്തരത്തില്‍ വികസന പ്രവര്‍ത്തനങ്ങള്‍ നടപ്പാക്കും. കുറഞ്ഞത് 40 കുടുംബങ്ങളെങ്കിലും ഉള്‍പ്പെട്ട കോളനികളെയാണ് സമഗ്രവികസനത്തിന് തിരഞ്ഞെടുക്കുക. വ്യക്തിഗത ക്ഷേമപ്രവര്‍ത്തനങ്ങള്‍, കുടുംബതലത്തിലുള്ള അടിസ്ഥാന സൗകര്യങ്ങള്‍, പൊതു സൗകര്യങ്ങള്‍, എന്നിവ ഉള്‍പ്പെടുത്തിയുള്ള ഒരു വികസന രേഖ രൂപപ്പെടുത്തുകയാണ് ഇത്തരത്തിലുള്ള ഒരു ആസൂത്രിത വികസന പരിപാടിയുടെ ആദ്യ പ്രവര്‍ത്തനം. ഭവനരഹിതര്‍ക്ക് ലൈഫ് പദ്ധതിയില്‍ ഉള്‍പ്പെടുത്തി ഭവനം നല്‍കും. താമസയോഗ്യമല്ലാത്ത ഭവനങ്ങളുടെ പുനരുദ്ധാരണം, അഴുക്ക് ചാല്‍ നിര്‍മാണം, തെരുവ് വിളക്കുകള്‍ സ്ഥാപിക്കുക, മാലിന്യസംസ്‌കരണം, സോളാര്‍ പാനല്‍ നിര്‍മാണം, കമ്മ്യൂനിറ്റി ഹാള്‍ , സ്വയംതൊഴില്‍ സംരംഭം, വൈദ്യുതി ലഭ്യത ഉള്‍പ്പെടെയുളള നിര്‍മാണ പ്രവര്‍ത്തനങ്ങളാണ് കോളനി നവീകരണത്തില്‍ ഉള്‍പ്പെടുത്തുക. മാതൃകാ കോളനികളാക്കി മാറ്റുന്നതിന് മുന്നോടിയായി പട്ടികജാതി വകുപ്പ് പ്രതിനിധികളും വാര്‍ഡ് മെമ്പറും നാല് കോളനികളും സന്ദര്‍ശിച്ച് ആവശ്യമായ അടിസ്ഥാന സൗകര്യങ്ങളുടെ വിവരങ്ങള്‍ ശേഖരിച്ച് സമര്‍പ്പിച്ച റിപ്പോര്‍ട്ട് പരിപാടിയില്‍ പട്ടികജാതി വികസന ജില്ലാ ഓഫീസര്‍ എസ്.വിജയരാഘവന്‍ അവതരിപ്പിച്ചു. ചല്ലിപ്പറമ്പ് കോളനി പരിസരത്ത് നടന്ന പരിപാടിയില്‍. ആലത്തൂര്‍ ബ്ലോക്ക് പഞ്ചായത്ത് പ്രസിഡന്റ് സി.കെ ചാമുണ്ണി അധ്യക്ഷനായി. വാര്‍ഡിലെ 12 കുടുംബശ്രീ യൂനിറ്റുകള്‍ക്ക് വരുമാനദായകമായ നൂതന സംരംഭങ്ങള്‍ തുടങ്ങുന്നതിന് 1,31,480 രൂപയുടെ ധനസഹായ വിതരണം ജില്ലാ കലക്ടര്‍ ഡോ:പി.സുരേഷ്ബാബു നിര്‍വഹിച്ചു. തുടര്‍ന്ന് ആരോഗ്യ വകുപ്പിന്റെ നേതൃത്വത്തില്‍ സൗജന്യ മെഡിക്കല്‍ കാംപും നടന്നു. ക്ഷേമകാര്യ സ്റ്റാന്‍ഡിങ് കമ്മിറ്റി ചെയര്‍മാന്‍ പി.ഗംഗാധരന്‍, വടക്കഞ്ചേരി ഗ്രാമപഞ്ചായത്ത് വൈസ് പ്രസിഡന്റ് കെ.കുമാരന്‍ , ബ്ലോക്ക് പഞ്ചായത്ത് മെമ്പര്‍ സി.പ്രഭാകരന്‍, കുടുംബശ്രീ ജില്ലാ മിഷന്‍ കോഡിനേറ്റര്‍ പി.സെയ്തലവി , ജില്ലാ ഇന്‍ഫര്‍മേഷന്‍ ഓഫീസര്‍ വി.പി സുലഭകുമാരി തുടങ്ങിയവര്‍ പങ്കെടുത്തു.

Story

ഒരു അറേബ്യന്‍ യാത്രയുടെ ഓര്‍മ്മകുറിപ്പുകള്‍ : കെ.പി.എസ് പയ്യനെടം.

മണ്ണാര്‍ക്കാട്ടെ വ്യവസായ പ്രമുഖനായ ബാവിക്ക എന്ന ടി. അബൂബക്കര്‍ നല്ലൊരു സഹൃദയനും കൂടിയാണ്. ധാരാളം വിദേശയാത്രകള്‍ അദ്ദേഹം നടത്താറുണ്ട്. യാത്രകളില്‍ എന്നെയും കൂടെകൂട്ടാന്‍ അദ്ദേഹം ആഗ്രഹിച്ചിരുന്നു. പാസ്‌പോര്‍ട്ട് എടുത്ത് റെഡിയായിരിക്കാന്‍ എന്നോട്ട്പറഞ്ഞു. വിദേശ യാത്ര എന്റെ തലയില്‍ കയറിയില്ല. അത്‌കൊണ്ട് പാസ്‌പോര്‍ട്ട് എടുക്കല്‍ നീണ്ടുപോയി. ബാവിക്കയുടെ നിര്‍ബന്ധം തുടര്‍ന്ന് കൊണ്ടിരിന്നു. അങ്ങനെ പാസ്‌പോര്‍ട്ട് എടുത്തു. അപ്പോള്‍ ബാവിക്ക ഉദ്ദേശിച്ച റൂട്ടില്‍ യാത്രാ പരിപാടി ഉണ്ടായിരുന്നില്ല. പക്ഷെ മെക്കയിലേക്ക് തീര്‍ത്ഥാടക സംഘം നിരന്തരം പോകുന്നുണ്ടല്ലോ. ബാവിക്ക എന്നെ അവയിലൊന്നില്‍ ബന്ധിപ്പിച്ചു. രാഷ്ട്രീയ നേതാവ്കൂടിയായ ഫായിദ ബഷീറിന്റെ ഫായിദ ട്രാവല്‍സ് ആയിരുന്നു അത്. എന്റെ യാത്ര തികച്ചും യാദൃക്ചികമായി വന്നതാണ്. പക്ഷെ എന്റെ ഭാര്യയും ചില ബന്ധുക്കളും നേരെത്തെ തന്നെ മെക്കാ തീര്‍ത്ഥാടനത്തിന് ഒരുങ്ങിയിരുന്നു. സംഗതിവശാല്‍ രണ്ടുപേരുടേയും യാത്ര ഒരേ സമയത്തായി. ഞാന്‍ 2015 മാര്‍ച്ച് 1 ന് പുറപ്പെട്ടു.കുടുംബം മാര്‍ച്ച് 2 നും. മാര്‍ച്ച് 1 ന് ഉച്ചകഴിഞ്ഞ് നെടുമ്പാശ്ശേരിയില്‍ നിന്ന് പുറപ്പെട്ടു. ആദ്യ വിമാനയാത്ര. അതിന്റെ കൗതുകവും ഉത്കണ്ഠയും. സമയം പോയതറിഞ്ഞില്ല. അഞ്ചര മണിക്കൂര്‍ കടന്നുപോയി. താഴെ ആയിരക്കണക്കിന് വിളക്കുകള്‍ നിറഞ്ഞ്കത്തുന്നു. വിമാനം ലാന്റ് ചെയ്യുകയാണ്. ജിദ്ദ. സൗദി സമയം രാത്രി 10 മണി. ഒരു വിദേശ രാജ്യത്തിന്റെ മണ്ണില്‍, ചരിത്രമുറങ്ങുന്ന അറേബ്യയുടെ മണ്ണില്‍ കാല് കുത്തുന്നു എന്ന ചിന്തയോടെ ഞാന്‍ ജിദ്ദയുടെ നിലംതൊട്ടുനിന്നു. മെക്കയിലേക്ക് ഞങ്ങളെ കൊണ്ടുപോകാനുള്ള ബസ്സ് വരാന്‍ കാത്തിരുന്നു. സമയം 12 : 30. ബസ്സില്‍ മെക്കയിലേക്ക്. രാത്രിയില്‍ കാഴ്ച്ചകള്‍ അവ്യക്തമായി. ചിലയിടങ്ങളിലെ നഗരവെളിച്ചങ്ങളില്‍ എന്തോ ചിലത് കണ്ടു. അറേബ്യ കാണാനായി ഇരുട്ടിലേക്ക് കണ്ണ് മിഴിച്ച് ഞാന്‍ ഇരുന്നു. ബസ്സ് ഒരിടത്തുനിന്നു. യാത്രക്കാര്‍ ഇറങ്ങുന്നു. താമസിക്കാനുള്ള ഹോട്ടലിനുമുന്നിലാണ്. ഫായിദ ബഷീറിന്റെ പിതാവ് ഞങ്ങളെ കാത്ത് നില്‍ക്കുന്നു. അദ്ദേഹം അവിടെ സ്ഥിരമാണ്. തീര്‍ത്ഥാടകര്‍ക്ക് താമസ സൗകര്യമൊരുക്കാന്‍ ആറു നിലയുള്ള ഒരു ഹോട്ടല്‍ അദ്ദേഹം ഏറ്റെടുത്തിരിക്കയാണ്. ഞങ്ങള്‍ ഹോട്ടലിലേക്ക്. പിന്നെ കുറച്ചുവിശ്രമം. പ്രഭാത വെളിച്ചത്തില്‍ മെക്ക നഗരം കാണാന്‍ ഞാന്‍ പുറത്തിറങ്ങി. പര്‍വ്വതങ്ങളാല്‍ ചുറ്റപ്പെട്ട ഒരു ചെറിയ നഗരം. മലയാളി കരുതുന്ന പോലുള്ള പര്‍വ്വതങ്ങളല്ല. ഒരു പുല്‍കൊടി പോലും മുളക്കാത്ത മലകള്‍. കൂറ്റന്‍ പാറക്കെട്ടുകളും ഉരുളന്‍ കല്ലുകളും മാത്രം നിറഞ്ഞ മലകള്‍. മലകളുടെ താഴ്‌വരയില്‍ വിശ്വ പ്രസിദ്ധമായ കഅ്ബ ദേവാലയവും അതിന്ചുറ്റും പള്ളിയും സമീപത്തെല്ലാം യാത്രക്കാരെ കാത്തുകിടക്കുന്ന കൂറ്റന്‍ ഹോട്ടല്‍ സമുച്ഛയങ്ങള്‍. മലഞ്ചരിവുകളിലും നിറയെ ഹോട്ടലുകള്‍. റിസോര്‍ട്ടുകള്‍. അവയെല്ലാം പൊളിച്ചു നീക്കുകയാണ്. പര്‍വ്വതങ്ങള്‍ അതേപടി നിലനിര്‍ത്താനാണെന്ന് കേട്ടു. നല്ലത്. മെക്കയിലെ പ്രധാന ആകര്‍ഷണം കഅബ ദേവാലയം തന്നെയാണ്. കറുത്ത തിരശ്ശീലകൊണ്ട് മൂടിയ ചതുരാകൃതിയിലുള്ള ഒരു ചെറിയ നിര്‍മ്മിതി. മറ്റൊന്നുമില്ല. പക്ഷെ ആയിരക്കണക്കിന് വര്‍ഷത്തെ ചരിത്രവും കോടാനുകോടി മനുഷ്യരുടെ സാന്നിദ്ധ്യവും കഅ്ബയെ അസാധാരണമാക്കുന്നു. കഅബക്കുചുറ്റും മെക്കാപ്പള്ളി. ലക്ഷങ്ങള്‍ക്ക് ഒരേ സമയം പ്രാര്‍ത്ഥന നടത്താവുന്നവിധം വിശാലം. തൊണ്ണൂറില്‍ അധികം വാതിലുകള്‍. അകത്ത് കൊത്തുവേലകളുടെ ശില്‍പഭംഗി. ഓരോ പ്രാര്‍ത്ഥന വേളയിലും ലക്ഷങ്ങള്‍ പള്ളിയിലേക്ക് ഒഴുകി എത്തുന്നു. പള്ളിക്കകത്തും മുറ്റത്തും സമീപവുമുള്ള റോഡുകളില്‍ കിലോ മീറ്റര്‍ നീളത്തിലും ആളുകള്‍ പ്രാര്‍ത്ഥനക്കായി അണിനിരക്കുന്നു. ലോകത്തിന്റെ ഒരു പരിചേഛദം. പലഭാഷക്കാര്‍ പലവേഷക്കാര്‍.... മെക്കയിലെ ഒരു ശ്രദ്ധേയമായ ആകര്‍ഷണീയത ഈ വൈവിധ്യമുള്ള മനുഷ്യരുടെ കൂടിച്ചേരലാണെന്ന് എനിക്ക് തോന്നി. പള്ളിയുടെ സമീപമാണ് പ്രവാചകന്‍ മുഹമ്മദ് നബി ജനിച്ച വീട് ഉണ്ടായിരുന്നത് എന്ന് കരുതപ്പെടുന്നു. ആ സ്ഥലത്ത് ഒരു ഗ്രന്ഥശാലയാണ് സൗദി ഭരണകൂടം സ്ഥാപിച്ചിട്ടുള്ളത്. സൗദി സര്‍ക്കാരിനെ ഞാന്‍ മനസ്സുകൊണ്ട് അഭിനന്ദിച്ചു. വായനശാലയുടെ മുറ്റത്തു നിന്ന് അവിടെ ഇരിക്കുന്ന കറുത്ത അറബിയോട് ഞാന്‍ ചിലതൊക്കെ ചോദിച്ചറിഞ്ഞു. അയാള്‍ ഏതാനും പുസ്തകങ്ങള്‍ എനിക്ക് നല്‍കി. പുസ്തകവും ഭക്ഷണവും ധാരാളമായി വെറുതെ കിട്ടും. ബിരിയാണി പൊതികള്‍ നിറച്ച വാഹനങ്ങള്‍ റോഡരികില്‍ നിര്‍ത്തിയിട്ട് കൈ കാണിക്കുന്നവര്‍ക്കെല്ലാം കൊടുത്തുകൊണ്ടിരിക്കും. അവിടുത്തെ ധനാഢ്യരായിരിക്കാം. പൊതി വാങ്ങുന്നത് പിച്ചക്കാരൊന്നുമല്ല. തീര്‍ത്ഥാടനത്തിനെത്തുന്ന ആരും അത്‌വാങ്ങിക്കൊണ്ടുപോകും. ഈത്തപ്പഴവും സൗജന്യമായി ധാരാളം ലഭിക്കും. പള്ളിക്കകത്തുവെച്ച് കുബ്ബൂസ് എന്ന അറബി റൊട്ടി വിതരണം ചെയ്യുന്നവരേയും കണ്ടു. മെക്ക നഗരത്തിന് സമീപം ഒരു മ്യൂസിയത്തില്‍ പോകാന്‍ അവസരം കിട്ടി. പഴയകാല വസ്തുക്കള്‍ പലതും അവിടെയുണ്ട്. പ്രവാചകന്റെ കാലത്തുള്ളത് എന്ന് കരുതപ്പെടുന്ന മരംകൊണ്ട് നിര്‍മ്മിച്ച ഒരു പ്രസംഗപീഠം കണ്ടു. അതിനുള്ള തേക്ക് നിലമ്പൂരില്‍ നിന്ന് കൊണ്ടുപോയതാണത്രേ. അറബികള്‍ എത്രയോ നൂറ്റാണ്ടുകള്‍ക്കുമുമ്പ് ഇവിടെ കച്ചവടത്തിനുവന്നിരുന്നല്ലോ. ഹോട്ടലില്‍ ഭക്ഷണം എത്തിക്കുന്നത് പയ്യനെടത്തുകാരനായ വാരിയങ്കാടന്‍ യൂസഫ് എന്ന ചെറുപ്പക്കാരനാണ്. യൂസഫ് അവിടെ കാറ്ററിംഗ് ബിസിനസ്സ് നടത്തുന്നു. വിവിധ ഹോട്ടലുകളില്‍ താമസിക്കുന്ന മലയാളികള്‍ക്ക് യൂസഫ് മൂന്നുനേരവും ഭക്ഷണം എത്തിച്ചുകൊണ്ടിരിക്കുന്നു. മെക്കയില്‍ നിന്നും മടങ്ങുമ്പോള്‍ ഒരു വലിയ കിറ്റ് ഇത്തപ്പഴം യൂസുഫ് തന്നത് നന്ദിപൂര്‍വ്വം ഓര്‍ക്കുന്നു. ഒമ്പത് ദിവസം മെക്കയില്‍ നിന്നു. ജിദ്ദയിലെ ഒരു സാംസ്‌കാരിക പരിപാടിയില്‍ എന്നെ പങ്കെടുപ്പിക്കാന്‍ ചില സുഹൃത്തുക്കള്‍ ശ്രമിച്ചു. ഞായറാഴ്ച്ചയായതുകൊണ്ട് ആളുകളെ സംഘടിപ്പിക്കാന്‍ പ്രയാസമായിരുന്നു. ഞാന്‍ മക്കയിലെത്തിയ വിവരം അവര്‍ അറിയാന്‍ വൈകി. അത്‌കൊണ്ട് ജിദ്ദയിലെ ഒരു സാംസ്‌കാരിക പരിപാടി നഷ്ട്ടമായി. ഒമ്പതാം ദിവസം മെക്കയില്‍ നിന്ന് മദീനയിലേക്ക് പുറപ്പെട്ടു. നഗരത്തിനുപുറത്തുകടന്നപ്പോള്‍ തന്നെ മരുഭൂമി ആരംഭിച്ചു. ഇനിയുള്ള ദീര്‍ഘമായ യാത്ര മരുഭൂമിയിലൂടെയാണ് എന്നറിഞ്ഞപ്പോള്‍ വലിയ സന്തോഷം തോന്നി. ഒരു കേരളീയനെ സംബന്ധിച്ച് അസാധാരണമായ കഴ്ച്ചയാണല്ലോ മരുഭൂമി. കണ്ണെത്താദൂരത്തോളം പരന്നുകിടക്കുന്ന മണല്‍പരപ്പ്. ചക്രവാളത്തിനും അപ്പുറത്തേക്ക് അത് നീണ്ടുപോകുന്നു. അങ്ങിങ്ങായി ചില കുറ്റിച്ചെടികള്‍. കഠിനമായ ചൂടിനെ അതിജീവിച്ച് അവ നിലകൊണ്ടു. ഏതുകാലവസ്ഥയിലും ജീവന്‍ തളിര്‍ത്തുനില്‍ക്കുന്നു. മരുഭൂമി ഒന്നുമില്ലാത്ത ശൂന്യതയല്ല. അത് ഒരു ആവാസ വ്യവസ്ഥയാണ്. അനേക ലക്ഷം ജീവജാലങ്ങള്‍, സസ്യലതാദികള്‍ മരുഭൂമിയിലുണ്ടെന്ന് ശാസ്ത്രം പറയുന്നു. ഒറ്റപ്പെട്ട ഒട്ടക കൂട്ടങ്ങളെ കണ്ടു. ഇസ്‌ലാമിക ചരിത്രത്തില്‍ ഈ മരുഭൂമിക്ക് വലിയ പ്രാധാന്യമുണ്ട്. ശത്രുക്കളെ ഭയന്ന് മെക്കയില്‍ നിന്ന് പാലായനം ചെയ്ത പ്രവാചകന്‍ ഈ മരുഭൂമിയിലൂടെയാണ് മദീനയിലേക്ക് പോയത്. ഏകദേശം 450 കിലോ മീറ്റര്‍ ദൂരമുണ്ട് രണ്ട് നഗരങ്ങള്‍ക്കുമിടയില്‍. പക്ഷെ യാത്രക്കെടുക്കുന്ന സമയം കേവലം 5 മണിക്കൂര്‍ മാത്രം. അത്രയും നല്ല ഹൈവേയിലൂടെയാണ് യാത്ര. ഇടക്ക് ഒരിടത്ത് വാഹനം നിര്‍ത്തി. ഒരു പെടോള്‍പമ്പ്, കുറച്ച് കടകള്‍, ചില ചില്ലറ വില്‍പ്പനക്കാര്‍, ഒരു പള്ളി എന്നിവയാണ് അവിടെ ഉണ്ടായിരുന്നത്. ഗ്ലാസ്സ്‌കൂടിനകത്ത് നിന്ന് ചായ പകര്‍ന്ന് നല്‍കുന്നത് ഒരു മലയാളി ചെറുപ്പക്കാരനായിരുന്നു. നാട്ടില്‍ കഴിയുന്നവരുടെ ജീവിതത്തിന് ആശ്വാസമേകാന്‍ അയാള്‍ ആ ഉഷ്ണമരുഭൂമിയുടെ വിജനതയില്‍ ദിനരാത്രങ്ങള്‍ തള്ളി നീക്കുന്നു. ഉച്ച കഴിഞ്ഞ് 2 മണിക്ക് മദീന പട്ടണത്തില്‍ എത്തി. മെക്കയിലെ പോലെ ഇവിടെ പര്‍വ്വതങ്ങള്‍ കാണാനില്ല. വിശാലമായ നഗരം. നിരപ്പായ പാതകള്‍. തിരക്കുപിടിച്ച നഗരം. മെക്കയേക്കാള്‍ സുന്ദരമാണ് മദീന നഗരം. നേരിയ തണുപ്പുള്ള കാലാവസ്ഥ. പ്രവാചകന്‍ മുഹമ്മദ് നബി തന്റെ ജീവിതത്തിന്റെ വലിയൊരു കാലഘട്ടം ചെലവഴിച്ചത് മദീനയിലാണ്. പ്രവാചകന്റെ കബറിടമാണ് ഇവിടുത്തെ ഒരു ആകര്‍ഷണകേന്ദ്രം. വിശാലമായ പള്ളി. സ്വര്‍ണ്ണ നിറമാര്‍ന്ന ശില്‍പവേലകളും ദീപാലങ്കാരങ്ങളുംകൊണ്ട് നയന മനോഹരമായിക്കുന്നു. വിശാലമായ, മാര്‍ബിള്‍ പതിച്ചമുറ്റം. സൂര്യനുദിക്കുമ്പോള്‍ വിടരുകയും സന്ധ്യയാകുമ്പോള്‍ സ്വയം ചുരുങ്ങുകയും ചെയ്യുന്ന നൂറുകണക്കിന് കുടകള്‍ മുറ്റത്തുനിന്ന് പ്രാര്‍ത്ഥിക്കുന്നവര്‍ക്ക് തണലേകുന്നു. പ്രവാചകന്റെ കബറിടം ഇരുമ്പുകവചങ്ങള്‍ കൊണ്ട് മറച്ചിരിക്കുന്നു. അതിനരികിലൂടെ കടന്നുപോകാം. അവിടെ നിന്ന് പ്രാര്‍ത്ഥിക്കാന്‍ അനുവാദമില്ല. മരിച്ചവരോട് പ്രാര്‍ത്ഥിച്ചിട്ട് കാര്യമില്ലെന്നാണ് സൗദി ഭരണകൂടത്തിന്റെ കാഴ്ച്ചപ്പാട്. മദീനയില്‍ വെച്ച് മലയാളിയായ ശ്യാമിനെ പരിചയപ്പെട്ടു. അവിടെ ഒരു കണ്‍സ്ട്രക്ഷന്‍ കമ്പനിയിലെ മാനേജറാണ് ശ്യം. പറളി സ്വദേശി. ശ്യം ഞങ്ങള്‍ കുറച്ചുപേരെ അദ്ദേഹത്തിന്റെ ഫ്‌ളാറ്റിലേക്ക് കൊണ്ടുപോയി. ഭാര്യയും രണ്ടു മക്കളും അടങ്ങുന്ന ശ്യാമിന്റെ കുടുംബം അറേബ്യന്‍ കുഴിമന്തി നല്‍കി ഞങ്ങളെ സല്‍ക്കരിച്ചു. മറ്റൊരു ദിവസം ശ്യം ഞങ്ങളെ അദ്ദേഹത്തിന്റെ വാഹനത്തില്‍ കുറേ ദൂരേക്ക് കൊണ്ടുപോയി. വിശാലമായ ഈത്തപ്പഴതോട്ടങ്ങള്‍ അവിടെ കണ്ടു. ജല സമൃദ്ധിയും നിറയെ പച്ചപ്പുമുള്ള സ്ഥലം സൗദിയില്‍ ചെന്നശേഷം ആദ്യമായി കാണുകയായിരുന്നു. വെള്ളം മേല്‍പ്പോട്ടൊഴുകുന്ന ഒരു കൗതുക കഴ്ച്ചയും ശ്യാം കാണിച്ചുതന്നു. ഞങ്ങള്‍ റോഡിലിറങ്ങി കുപ്പിയിലെ വെള്ളം റോഡിലൊഴിച്ചു. ഉയരമുള്ള ഭാഗത്തേക്ക് അത് ഒഴുകിപോയി. മറ്റുപല യാത്രക്കാരും ഇത് കാണാന്‍ റോഡിലിറങ്ങിയിട്ടുണ്ടായിരുന്നു. ഇവിടെ കുന്നുകയറുമ്പോള്‍ വാഹനം നൂട്രലില്‍ ഓടും. സാധാരണ ഇറക്കത്തിലാണല്ലോ നൂട്രലില്‍ വണ്ടി ഓടുന്നത്. ഇത് ദിവ്യാത്ഭുതമൊന്നുമല്ല. ഭൂമിയുടെ ഗുരുത്വാകര്‍ഷണത്തിലുള്ള മാറ്റമാണ്. ഗുരുത്വാകര്‍ഷണബലം ഇവിടെ എതിര്‍ദിശയില്‍ പ്രവര്‍ത്തിക്കുന്നു. ലോകത്തില്‍ ഇങ്ങനെ 12 സ്ഥലങ്ങള്‍ ഉണ്ടെന്നും അറിയാന്‍ കഴിഞ്ഞു. ഇസ്‌ലാമിക ചരിത്രത്തിലെ പ്രധാന്യമുള്ള ചില സ്ഥലങ്ങള്‍ കൂടി ശ്യം കാണിച്ചുതന്നു. ശ്യാമിനെ കിട്ടിയില്ലായിരുന്നെങ്കില്‍ അതൊന്നും കാണാന്‍ കഴിയുമായിരുന്നില്ല. മാര്‍ച്ച് 15 നായിരുന്നു മടക്കയാത്ര. പുലര്‍ച്ചെ 12 : 30 ന് ജിദ്ദയില്‍ നിന്നുള്ള ഫ്‌ളൈറ്റില്‍ കേരളത്തിലേക്ക് രാവിലെ 9 : 30 ന് നെടുമ്പാശ്ശേരിയില്‍ വന്നിറങ്ങുമ്പോള്‍ സത്യം പറയാമല്ലൊ നല്ല ആശ്വാസമുണ്ടായിരുന്നു. വിദൂര ദേശങ്ങള്‍ കൗതുകങ്ങളും അല്‍ഭുതങ്ങളും കാണിച്ചുതരുന്നുണ്ട്. യാഥാര്‍ത്ഥ്യം തന്നെ. പക്ഷെ പച്ചപിടിച്ച കേരളത്തിന്റെ മണ്ണ് നല്‍കുന്ന സുഖം... അതൊന്ന് വേറെ തന്നെയാണ്. സഹസ്രാബ്ദങ്ങളുടെ ചരിത്രമുറങ്ങുന്ന അറേബ്യന്‍ ഭൂപ്രദേശം നല്‍കിയ മറക്കാത്ത ഓര്‍മ്മകളുമായി ഞാന്‍ വീണ്ടും എന്റെ കര്‍മ്മ പഥങ്ങളിലേക്ക്.

ഫോട്ടോഗ്രാഫി വെറും കളിയല്ല. ചത്തീസ്ഗഢില്‍ ചിത്രപ്രദര്‍ശനം നടത്തുന്ന മലയാളിയായ സെയ്ഫുള്ളയുടെ കഥ.

ആര്‍ക്കും ഒരു ഫോട്ടോ എടുക്കാം. പക്ഷെ ജീവനുള്ള ഫോട്ടോ ജനിക്കണമെങ്കില്‍ ഫോട്ടോഗ്രാഫറുടെ ഹൃദയം കലയും നന്മയും നിറഞ്ഞതാകണം. അങ്ങിനെയുള്ളൊരു ഫോട്ടോഗ്രാഫറുടെ കഥയാണ് ഇവിടെ പറയുന്നത്. പെരിന്തല്‍മണ്ണ അങ്ങാടിപ്പുറം സ്വദേശി സെയ്ഫുള്ളയാണ് താരം. 20 വര്‍ഷമായി സെയ്ഫിന്റെ ക്യാമറ മിഴിതുറന്നിരിക്കുകയാണ്.. 8 ാം ക്ലാസ്സില്‍ പഠിക്കുമ്പോള്‍ തന്നെ സെയ്ഫുള്ള ഫോട്ടോഗ്രാഫി ആരംഭിച്ചിരുന്നു. കേരള സ്റ്റേറ്റിന്റെ ഔദ്യോഗിക ഫോട്ടോഗ്രാഫറാണിപ്പോള്‍ സെയ്ഫുള്ള. പോസ് ചെയ്‌തെടുക്കുന്ന മോഡലിംങ്ങ് ഫോട്ടോഗ്രാഫിയെക്കാള്‍ ഇദ്ദേഹത്തിന് താല്‍പ്പര്യം ചലിക്കുന്ന ദൃശ്യങ്ങളെ ചിത്രമായെടുക്കുന്നതാണ്. കേരള സംസ്ഥാന സ്‌ക്കൂള്‍ കലോത്സവം വേദികളില്‍ പോകുന്നവരെല്ലാം സെയ്ഫിനെ ഒരു തവണയെങ്കിലും കണ്ട്കാണും. വര്‍ഷങ്ങളായി കലോത്സവ വേദികളിലെ സാന്നിദ്ധ്യമാണ് സെയ്ഫ്. സംസ്ഥാന സ്‌ക്കൂള്‍ കലോത്സവം, യൂണിവേഴ്‌സിറ്റി കലോത്സവം, ഇന്റര്‍സോണ്‍ കലോത്സവം, സൗത്ത് സോണ്‍ & നാഷണല്‍ സോണ്‍ കലോത്സവം എന്നിവയുടെ ഓരോ ചലനങ്ങളും പോസ് ചെയ്യിപ്പിക്കാതെ അതിന്റെ തനിമയില്‍ ഒപ്പിയെടുക്കുന്നതില്‍ സ്‌പെഷലൈസ് ചെയ്ത ഫോട്ടോഗ്രാഫറാണ് സെയ്ഫുള്ള. പ്രശസ്ത നൃത്തധ്യാപകരുടേയും വിദ്യാര്‍ത്ഥികളുടേയും അരങ്ങേറ്റം, റിസള്‍ട്ടന്‍സ് എന്നിവ ചെയ്ത് ഡാന്‍സ് ഫോട്ടോഗ്രഫിയില്‍ സ്‌പെഷ്യലൈസ് ചെയ്യുന്നുമുണ്ട്. വിവിധ മേഖലകളില്‍ നിന്നും സൈഫ് ഒപ്പിയെടുത്ത നൃത്തനൃത്യങ്ങളുടെ ചിത്രങ്ങള്‍ ഒരുമിപ്പിച്ച് ഇന്ത്യയ്ക്കകത്തും പുറത്തും സെയ്ഫ് ഫോട്ടോഗ്രഫി ഇവന്റ് നടത്തി വരുന്നുണ്ട്. ചത്തീസ്ഗഢിലാണ് സെയ്ഫിന്റെ ഫോട്ടോ പ്രദര്‍ശനം ഇപ്പോള്‍ നടക്കുന്നത്. ചത്തീസ്ഗഢിലെ മലയാളി കൂട്ടായ്മയായ കേരള സമാജം ദുര്‍ഗ്ഗ് ബിലായ സംഘടിപ്പിക്കുന്ന 15 ാം മത് ആള്‍ ഇന്ത്യ ഡാന്‍സ് & മ്യൂസിക് കോംപറ്റീഷന്‍ എന്ന പരിപാടിയിലാണ് സെയ്ഫുള്ള പ്രദര്‍ശനം ഒരുക്കിയിരിക്കുന്നത്. ചത്തീസ്ഗഢിലെ ദുര്‍ഗ്ഗ് നിയോജക മണ്ഡലം എം.എല്‍.എ അരുണ്‍ വോറയാണ് സ്റ്റാളിന്റെ ഉദ്ഘാടനം നിര്‍വ്വഹിച്ചത്. സെപ്റ്റംബര്‍ 24 മുതല്‍ 28 വരെയാണ് ചത്തീസ്ഗഢ് ബിലായ് എസ്.എന്‍ജി ഓഡിറ്റോറിയത്തില്‍ ഫോട്ടോ പ്രദര്‍ശനം നടക്കുന്നത്. സെയ്ഫിന്റെ ക്യാമറയിലൂടെ വിരിഞ്ഞ നൃത്തചുവടുകളുടെ ചിത്രങ്ങള്‍ കാണാന്‍ ചത്തീസ്ഗഢില്‍ വന്‍ തിരക്കാണ് അനുഭവപ്പെടുന്നത്.

Programms

Videos

mannarkkad pooram

chettivela live

mannarkkad pooram

chettivelaa live

mannarkkad pooram

chettivela live

mannarkkad pooram

mannarkkad ive