വടക്കുമണ്ണം ശ്രീ സുന്ദരേശ്വര ശിവക്ഷേത്രത്തിൽ പകൽ മോഷണം.

വടക്കുമണ്ണം ശ്രീ സുന്ദരേശ്വര ശിവക്ഷേത്രത്തിൽ വ്യാഴാഴ്ച്ച പകൽ മോഷണം നടന്നു. ഉച്ചയ്ക്ക് 12 മണിയോടെയാണ് സംഭവം. 5 മണിയോടെ ക്ഷേത്ര നടതുറക്കുന്നതിനായി തന്ത്രിയെത്തിയപ്പോഴാണ് സംഭവം ശ്രദ്ധയിൽപ്പെട്ടത്‌. ക്ഷേത്ര പരിസരത്തുള്ള ഭണ്ഡാരം തുറന്ന് കടക്കുന്ന നിലയിലായിരുന്നു. ഒരു മാസത്തെ സംഖ്യയാണ് ഭണ്ഡാരത്തിലുണ്ടായിരുന്നത്. ഏകദേശം 2500 ലധികം രൂപ നഷ്ട്ടപ്പെട്ടതായാണ് ക്ഷേത്രം ഭാരവാഹികൾ കരുതുന്നത്. ചില്ലറത്തുട്ടുകൾ ഉപേക്ഷിച്ച നിലയിലാണ്. മണ്ണാർക്കാട് പോലീസ് സ്ഥലത്തെത്തി.

News

ഹർത്താലിന്റെ മറവിൽ മണ്ണാർക്കാട് കെ എസ് ആർ ടി സി ബസിനെതിരെ അക്രമം : 2 ബസ്സുകളുടെ ചില്ലുകള്‍ തകര്‍ന്നു.

ഹർത്താലിന്റെ മറവിൽ മണ്ണാർക്കാട് കെ എസ് ആർ ടി സി ബസിനെതിരെ അക്രമം. മുൻവശത്തെ ചില്ലുകൾ അക്രമികൾ എറിഞ്ഞു തകർത്തു. ബുധനാഴ്ച രാത്രി 12 മണിയോടു കൂടിയാണ് സംഭവം. ഒന്നിടവിട്ട് രണ്ട് ബസുകൾക്കെതിരെയാന്ന് ആസൂത്രിതമായ അക്രമം നടത്തിയത്. കോഴിക്കോട് നിന്ന് പാലക്കാട്ടേക്ക് സഞ്ചരിച്ച ടൗൺ ടു ടൗൺ ബസിന് നൊട്ടമ്മലക്ക് സമീപത്ത് വച്ചാണ് ഏറ് കൊണ്ടത്. ബസ് കൈകാണിച്ച് നിർത്താനാവശ്യപ്പെട്ട അക്രമികളിലൊരാൾ ബസിന്റെ വേഗം കുറഞ്ഞതോടെ ഡ്രൈവറുടെ നേരെ കല്ല് ആഞ്ഞെറിഞ്ഞു. തുടർന്ന് സഹായിക്കൊപ്പം ബൈക്കിൽ രക്ഷപ്പെട്ടതായി ഡ്രൈവർ വിശദീകരിച്ചു. ഏറിന്റെ ശക്തിയിൽ മുൻവശത്തെ ചില്ല് പൂർണ്ണമായും തകർന്നു. തലനാരിഴക്കാണ് ഡ്രൈവർ രക്ഷപ്പെട്ടത്. പാലക്കയം - കോട്ടയം സൂപ്പർഫാസ്റ്റിനെതിരെ കാഞ്ഞിരത്ത് വച്ചാണ് അക്രമമുണ്ടായത്. പാലക്കയത്ത് നിന്ന് മണ്ണാർക്കാട് ഡിപ്പോയിലേക്കുള്ള വഴിമധ്യേ പിൻവശത്തെ ചില്ലിലേക്കാണ് അക്രമികൾ കല്ലെറിഞ്ഞത് . സംഭവത്തെ തുടർന്ന് സി.ഐ.ടി.പി.ഫർഷാദിന്റെ നേതൃത്വത്തിൽ പോലീസ് കേസെടുത്തു.

കുണ്ടൂർകുന്ന് സ്വദേശി വാസുദേവൻ നമ്പൂതിരി ശബരിമല പുതിയ മേൽശാന്തി.

ശബരിമലക്ക് പുതിയ മേൽശാന്തിയായി കുണ്ടൂർകുന്ന് സ്വദേശി. തച്ചനാട്ടുകര ഗ്രാമപഞ്ചായത്തിലെ കുണ്ടൂർകുന്ന് വരിക്കാശേരി മനയിലെ വാസുദേവൻ നമ്പൂതിരിയാണ് ശബരിമല മേൽശാന്തിയായി നിശ്ചയിക്കപ്പെട്ടത്. ജനിച്ചതും വളർന്നതും നാട്ടിലെങ്കിലും അദ്ദേഹം ബാംഗ്ലൂരിലാണ് ഇപ്പോൾ സ്ഥിരതാമസം. ഉപരി പoനത്തിനായാണ് അദ്ദേഹം ബാംഗ്ലൂരിലെത്തിയത്. നിലവിൽ അവിടുത്തെ അയ്യപ്പക്ഷേത്രത്തിൽ പൂജാരിയാണ്. അയ്യപ്പന്റെ അനുഗ്രഹമാണ് നിമിത്തമായതെന്ന് പറഞ്ഞ വാസുദേവൻ നമ്പൂതിരി നിലവിൽ ശബരിമലയിലെ പ്രശ്നങ്ങളെ സംബന്ധിച്ച് പ്രതികരിച്ചില്ല.

കുളപ്പാടത്തു നിന്ന് തൃശൂരിലേക്ക് കെ എസ് ആർ ടി സി പുതിയ സർവ്വീസ് ആരംഭിച്ചു.

കുളപ്പാടത്തു നിന്ന് തൃശൂരിലേക്ക് കെ എസ് ആർ ടി സി പുതിയ സർവ്വീസ് ആരംഭിച്ചു. ബസിന് നാട്ടുകാർ ബുധനാഴ്ച സ്വീകരണം നൽകി. മണ്ണാർക്കാട് കുളപ്പാടം തോട്ടര വഴിയാണ് തൃശൂരിലേക്ക് പുതിയ റൂട്ട് അനുവദിച്ചത്. നിലവിൽ ആര്യമ്പാവ് വഴി മണ്ണാർക്കാട് തൃശൂർ റൂട്ടിൽ സർവീസ് നടത്തുന്ന ബസാണ് കുളപ്പാടം വഴി ഓടുന്നത്. ജനവാസമുള്ള ഗ്രാമപ്രദേശങ്ങളിൽ സർവീസ് നടത്തുന്നത് ലാഭകരമാവുമെന്ന കണക്കുകൂട്ടലിലാണ് പരീക്ഷണാടിസ്ഥാനത്തിൽ പുതിയ റൂട്ട് കെ എസ് ആർ ടി സി അനുവദിച്ചത്. മണ്ണാർക്കാട് നിന്ന് രാവിലെ 6 : 40 ന് പുറപ്പെടുന്ന ബസ് ആര്യമ്പാവ് വഴി തിരിച്ച് മണ്ണാർക്കാടെത്തും.

വിവിധ സംഘടനകളുടെ നേതൃത്വത്തില്‍ കുന്തിപ്പുഴ പാണ്ടിക്കാട് നിന്നും നാമജപയാത്ര സംഘടിപ്പിച്ചു.

വിവിധ സംഘടനകളുടെ നേതൃത്വത്തില്‍ കുന്തിപ്പുഴ പാണ്ടിക്കാട് നിന്നും നാമജപയാത്ര സംഘടിപ്പിച്ചു. രാഷ്ട്രീയ ഭേതമന്യേ അയ്യപ്പ ഭക്തരുടെ കൂട്ടായ്മയായാണ് യാത്ര നടന്നത്. പാണ്ടിക്കാട് സുബ്രഹ്മണ്യ സ്വാമി ക്ഷേത്രത്തില്‍ നിന്നുമാരംഭിച്ച നാമജപയാത്ര വട്ടമ്പലം ഭഗവതി ക്ഷേത്രത്തില്‍ സമാപിച്ചു. 100 കണക്കിന് ജനങ്ങളാണ് യാത്രയില്‍ പങ്കെടുത്തത്. പി.പരമേശ്വരന്‍ മുഖ്യപ്രഭാഷണം നടത്തി. രവീന്ദ്രന്‍, സുരേഷ്, രാമചന്ദ്രന്‍, അരവിന്ദാക്ഷന്‍, ഷിബു, എം.ആര്‍.പ്രസാദ്, ഗോപിനാഥന്‍ തുടങ്ങിയവര്‍ നേതൃത്വം നല്‍കി.

District News

വിദ്യാഭ്യാസ വായ്പ നല്‍കുന്നതില്‍ ബാങ്കുകള്‍ ഉദാര സമീപനം സ്വീകരിക്കണം : ജില്ലാ കലക്റ്റര്‍

വിദ്യാഭ്യാസ വായ്പ നല്‍കുന്നതില്‍ ബാങ്കുകള്‍ ഉദാര സമീപനം സ്വീകരിക്കണമെന്ന് ജില്ലാ കലക്റ്റര്‍ ഡി. ബാലമുരളി പറഞ്ഞു. ജില്ലാതല ബാങ്കിങ് അവലോകന സമിതി യോഗത്തിലാണ് ജില്ലാ കലക്റ്റര്‍ ഇക്കാര്യം പറഞ്ഞത്. പുതിയ അധ്യയനവര്‍ഷം ലഭിക്കുന്ന വിദ്യാഭ്യാസ വായ്പ അപേക്ഷകളില്‍ അര്‍ഹരായവര്‍ക്ക് ആവശ്യമായ തുക അനുവദിക്കണം. വായ്പാ നടപടികള്‍ ലളിതമാക്കാനും വിദ്യാര്‍ഥികള്‍ക്ക് ബോധവത്ക്കരണം നല്‍കാനും ബാങ്ക് അധികൃതര്‍ മുന്‍കൈയെടുക്കണം. ചെറുകിട വ്യാവസായിക മേഖലക്കായുള്ള മുദ്ര ലോണുകള്‍ കൂടുതലായി അനുവദിക്കണമെന്നും ജില്ലാ കലക്റ്റര്‍ യോഗത്തില്‍ പറഞ്ഞു. 2017,18 സാമ്പത്തിക വര്‍ഷം ജില്ലയില്‍ 14080 കോടി വായ്പ വിതരണം ചെയ്ത് ജില്ലാ വായ്പാ പദ്ധതിയുടെ 98 ശതമാനം ലക്ഷ്യം നേടി. കാര്‍ഷിക മേഖലയ്ക്ക് 5275 കോടിയും വ്യാവസായിക മേഖലയ്ക്ക് 3527 കോടിയും മറ്റ് മുന്‍ഗണനാ മേഖലയ്ക്ക് 2097 കോടിയും മുന്‍ഗണനാ മേഖലയ്ക്ക് 10899 കോടിയും മുന്‍ഗണനേതര മേഖലയ്ക്ക് 3181 കോടിയും വായ്പ നല്‍കി. ജില്ലയിലെ വായ്പാ-നിക്ഷേപ അനുപാതം 67 ശതമാനമാണ്. 440 വിദ്യാഭ്യാസ വായ്പ അപേക്ഷയില്‍ 9.3 കോടി വായ്പ അനുവദിച്ചു. 2333 സ്വയം സഹായ സംഘങ്ങള്‍ക്ക് 59.6 കോടി നല്‍കി. ജില്ലയിലെ കര്‍ഷകര്‍ക്ക് കഴിഞ്ഞ മൂന്ന് മാസത്തിനിടയില്‍ 23137 കിസാന്‍ ക്രെഡിറ്റ് കാര്‍ഡുകള്‍ വഴി 257.32 കോടിയും മുദ്ര ലോണ്‍ വിഭാഗത്തില്‍ 15828 അപേക്ഷകളില്‍ 97.20 കോടിയും അനുവദിച്ചതായി യോഗം വിലയിരുത്തി. ഹോട്ടല്‍ ഗസാലയില്‍ നടന്ന പരിപാടിയില്‍ ലീഡ് ഡിസ്ട്രിക്ട് മാനെജര്‍ ഡി.അനില്‍, കാനറാ ബാങ്ക് അസി.ജനറല്‍ മാനെജര്‍ സി.എം. ഹരിലാല്‍, റിസര്‍വ് ബാങ്ക് പ്രതിനിധി ഹരിദാസ്, നബാര്‍ഡ് ഡി.ഡി.എം. രമേഷ് വേണുഗോപാല്‍, വിവിധ വകുപ്പ് ജില്ലാതല ഉദ്യോഗസ്ഥര്‍ പങ്കെടുത്തു.

സാമൂഹിക മാധ്യമങ്ങള്‍ വായനയെ ഗുണപരമായും ദോഷകരമായും സ്വാധീനിക്കുന്നു : എം.ബി. രാജേഷ് എം.പി.

സാമൂഹിക മാധ്യമങ്ങള്‍ വായനയെ ഗുണപരമായും ദോഷകരമായും സ്വാധീനിക്കുന്നുണ്ടെന്ന് എം.ബി. രാജേഷ് എം.പി. പറഞ്ഞു. പി.എന്‍. പണിക്കരുടെ സ്മരണക്കായി നടത്തുന്ന വായനാവാരം ഉദ്ഘാടനം ചെയ്യുകയായിരുന്ന എം.പി. സാമൂഹിക മാധ്യമങ്ങള്‍ ഒരേ സമയം വായനയ്ക്ക് അവസരവും വെല്ലുവിളിയുമാണ്. പുസ്തകങ്ങള്‍ക്ക് പകരം ഫോണിലൂടെയുള്ള വായന ഇന്ന് സാധ്യമാണ്. എന്നാല്‍ ആവശ്യമുള്ളതും ഇല്ലാത്തതും ഇന്റര്‍നെറ്റ് വഴി പ്രചരിക്കുന്നു. ശരിയായ വായന കണ്ടെത്തുന്നതിന് ഇത് തടസമാകുന്നു. ആത്മവിശ്വാസമുള്ള പൗരനെ സൃഷ്ടിക്കാന്‍ വായനയ്ക്കാവും. പരിചിതമല്ലാത്ത ലോകത്തെ പരിചയപ്പെടാന്‍ വായനയിലൂടെ സാധിക്കും. പടിപടിയായുള്ള വ്യക്തിത്വ വികസനത്തിന് വായനയാണ് മികച്ച മാര്‍ഗം. ഒരാളുടെ ജീവിത ശൈലിയ തന്നെ മാറ്റിയെടുക്കാനുള്ള ശക്തി വായനയ്ക്കുണ്ടെന്നും എം.പി. പറഞ്ഞു. ആള്‍ക്കൂട്ടത്തെ സമൂഹമാക്കി മാറ്റുന്നതാണ് വായനയെന്നും മനുഷ്യനെ നിരായുധരാക്കാന്‍ വായനയ്ക്കാവുമെന്നും പരിപാടിയില്‍ മുഖ്യപ്രഭാഷണം നടത്തിയ സാഹിത്യകാരി എം.ബി. മിനി പറഞ്ഞു. ഇന്‍ഫര്‍മേഷന്‍ പബ്ലിക് റിലേഷന്‍സ് വകുപ്പിന്റെയും ലൈബ്രറി കൗണ്‍സിലിന്റെയും അഭിമുഖ്യത്തില്‍ ജൂണ്‍ 25 വരെയാണ് വാരാഘോഷം. പി.എന്‍.പണിക്കര്‍ ഫൗണ്ടേഷന്‍, സാക്ഷരതാ മിഷന്‍, കാന്‍ഫെഡ്, വിദ്യാഭ്യാസ വകുപ്പ്, കുടുംബശ്രീ എന്നിവരുടെ സഹകരണത്തോടെയാണ് പരിപാടികള്‍ നടത്തുന്നത്. കൂടാതെ ലൈബ്രറി കൗണ്‍സില്‍ ജൂലൈ ഏഴ് വരെ വായനാപക്ഷത്തില്‍ വിവിധ പരിപാടികള്‍ സംഘടിപ്പിക്കും. വിദ്യാഭ്യാസ വകുപ്പിന്റെ ആഭിമുഖ്യത്തില്‍ വിദ്യാര്‍ഥികള്‍ക്കും സാക്ഷരതാ മിഷന്‍ പൊതുജനങ്ങള്‍ക്കുമായി കവിതാലാപന മത്സരം സംഘടിപ്പിക്കും. വിദ്യാഭ്യാസ വകുപ്പ് ക്വിസ് മത്സരവും സംഘടിപ്പിക്കും. ലൈബ്രറി കൗണ്‍സില്‍ സെമിനാറുകള്‍, പുസ്തക പ്രദര്‍ശനം വനിതാ വായന കൂട്ടായ്മ, സ്‌കൂളുകളിലെ എഴുത്ത്‌പെട്ടി വിപുലീകരണം, സ്‌കൂള്‍ ലൈബ്രറികളുടെ ശാക്തീകരണം, അമ്മ വായന സദസ്, ലഹരി വിരുദ്ധ സഭകള്‍, വീടുകളില്‍ നിന്നും പുസ്തകങ്ങള്‍ ശേഖരിക്കുന്ന അക്ഷരഭിക്ഷ, പൊന്‍കുന്നം വര്‍ക്കി-വൈക്കം മുഹമ്മദ് ബഷീര്‍-ഐ.വി.ദാസ് അനുസ്മരണം എന്നിവ നടത്തും. ബി.ഇ.എം ഹൈസ്‌കൂളില്‍ നടന്ന പരിപാടിയില്‍ ലൈബ്രറി കൗണ്‍സില്‍ സംസ്ഥാന എക്‌സിക്യുട്ടീവ് അംഗം പി.കെ സുധാകരന്‍ അധ്യക്ഷനായി. എ.ഡി.എം റ്റി. വിജയന്‍ പ്രതിജ്ഞ ചൊല്ലിക്കൊടുത്തു. ജില്ലാ ഇന്‍ഫര്‍മേഷന്‍ ഓഫീസര്‍ വി.പി.സുലഭ, കുടുംബശ്രീ ജില്ലാ മിഷന്‍ കോഡിനേറ്റര്‍ പി.സെയ്തലവി, വിദ്യാഭ്യാസ ഡെപ്യൂട്ടി ഡയറക്ടര്‍ ഇന്‍ചാര്‍ജ് യു.സായ്ഗിരി, കാന്‍ഫെഡ് ജില്ലാ സെക്രട്ടറി പി.എസ്. നാരായണന്‍, ജില്ലാ സാക്ഷരതാ സമിതി അംഗം പേരൂര്‍ പി. രാജഗോപാലന്‍, ജില്ലാ സാക്ഷരതാ മിഷന്‍ അസി. കോഡിനേറ്റര്‍ പി.വി പാര്‍വതി, പ്രധാനധ്യാപിക ജോയ്‌സി കെ. ജോസഫ് തുടങ്ങിയവര്‍ പങ്കെടുത്തു.

ഗവ.മെഡിക്കല്‍ കോളെജ് നിര്‍മാണ പ്രവര്‍ത്തനം വിലയിരുത്താന്‍ ത്രൈമാസം യോഗം വിളിക്കും - മന്ത്രി എ.കെ ബാലന്‍, 2019 ജൂണില്‍ പൂര്‍ത്തിയാക്കുമെന്ന് ഉദ്യോഗസ്ഥര്‍

പാലക്കാട് ഗവ.മെഡിക്കല്‍ കോളെജ് കെട്ടിടസമുച്ചയം കരാര്‍വ്യവസ്ഥ പ്രകാരം സമയബന്ധിതമായി പൂര്‍ത്തിയാക്കണമെന്നും അല്ലാത്തപക്ഷം ബന്ധപ്പെട്ട ഉദ്യോഗസ്ഥര്‍ക്ക് ശിക്ഷാ നടപടികള്‍ ഉണ്ടാകുമെന്നും മന്ത്രി എ.കെ ബാലന്‍ കര്‍ശന നിര്‍ദ്ദേശം നല്‍കി. 2019 ജൂണിലാണ് കരാര്‍ പ്രകാരം പണി പൂര്‍ത്തിയാക്കേണ്ടത്. ഇതിനായി സൂപ്രണ്ടിങ് എഞ്ചിനീയര്‍ ഓരോ മാസവും അവലോകനം നടത്തി നിര്‍മാണ പ്രവര്‍ത്തനം വിലയിരുത്തണമെന്നും ഓരോ മൂന്ന് മാസത്തിലും അവലോകനം നടക്കുമെന്നും മന്ത്രി പറഞ്ഞു. മെഡിക്കല്‍ കോളെജ് കെട്ടിടനിര്‍മാണപ്രവര്‍ത്തനങ്ങള്‍ നേരിട്ടെത്തി വിലയിരുത്തിയ ശേഷമുളള അവലോകനയോഗത്തിലാണ് മന്ത്രി ഇക്കാര്യം അറിയിച്ചത്. പൂര്‍ത്തിയാക്കേണ്ട ദിവസം വരെ ചെയ്യേണ്ട പ്രവര്‍ത്തനങ്ങള്‍ മുന്‍കൂട്ടി തയ്യാറാക്കി സര്‍ക്കാറിന് സമര്‍പ്പിക്കാനും ഉദ്യോഗസ്ഥര്‍ക്ക് മന്ത്രി നിര്‍ദ്ദേശം നല്‍കി. ഇന്ത്യന്‍ മെഡിക്കല്‍ കൗണ്‍സിലിന്റെ അംഗീകാരം കിട്ടാന്‍ സര്‍ക്കാര്‍ എല്ലാവിധ ശ്രമങ്ങളും തുടരുകയാണെന്നും അതിനായി മെഡിക്കല്‍ കോളെജിനായി പട്ടികജാതി-വര്‍ഗ്ഗ വകുപ്പിന്റെ ഫണ്ട് ഉപയോഗിച്ചുളള പ്രവര്‍ത്തനങ്ങള്‍ നടത്തി വരികയാണെന്നും മന്ത്രി പറഞ്ഞു. നിലവില്‍ 65000 സ്‌ക്വയര്‍ ഫീറ്റ് വിസ്തൃതിയുളള അക്കാദമിക്ക് ബ്ലോക്കിന്റെ നിര്‍മാണം പ്രവര്‍ത്തനം 12.60 കോടി ചെലവില്‍ 2014-ല്‍ പൂര്‍ത്തിയാക്കിയിട്ടുണ്ട്. 13 കോടി വീതം ചെലവില്‍ 2017-ല്‍ ആണ്‍കുട്ടികളുടെയും പെണ്‍കുട്ടികളുടേയും ഹോസ്റ്റലുകളും പൂര്‍്ത്തിയായിട്ടുണ്ട്. 26 ലക്ഷം ലിറ്റര്‍ ജലസംഭരണ ശേഷിയുളള ഭൂഗര്‍ഭ ടാങ്ക് നിര്‍മാണം 5.6 കോടി ചെലവില്‍ 2016-ല്‍ പൂര്‍ത്തിയായിട്ടുണ്ട്. ലെക്ച്ചറര്‍ ക്ലാസ്സ് റൂം, ലാബുകള്‍, പഠനക്ലാസ്സുകള്‍ എന്നിവ ഉള്‍പ്പെട്ട പ്രധാനകെട്ടിടത്തിന്റെ നിര്‍മാണം 2017 ഡിസംബറില്‍ പൂര്‍ത്തിയാക്കും. 32.66 കോടി ചെലവിലാണ് നിര്‍മാണം നടന്നു വരുന്നത്. 5.4 കോടിയുടെ അതിര്‍ത്തി മതിലുകളുടേയും ഗേയ്റ്റിന്‍േയും നിര്‍മാണം ജലസേചനവിഭാഗത്തിന്റെ സ്ഥലം ഉള്‍പ്പെട്ടു എന്ന കാരണത്താല്‍ ഹൈക്കോടതിയില്‍ കേസ് പരിഗണനയിലാണ്. ഇതില്‍ ജലസേചനവിഭാഗത്തിന്റെ സ്ഥലം ഒഴിവാക്കി നിര്‍മാണ പ്രവര്‍്ത്തനം നടത്താമെന്ന സത്യവാങ്മൂലം കോടതിയില്‍ സമര്‍പ്പിച്ച് പ്രവൃത്തി തുടരാന്‍ ശ്രമിക്കണമെന്ന് മന്ത്രി ഉദ്യോഗസ്ഥര്‍ക്ക് നിര്‍ദ്ദേശം നല്‍കി. 7.5 കോടി ചെലവില്‍ തുടങ്ങിവെച്ച ഇന്റേണല്‍ റോഡിന്റെ നിര്‍മാണം എല്ലാ നിര്‍മാണ പ്രവര്‍ത്തനങ്ങള്‍ക്കും ശേഷം പൂര്‍ത്തിയാക്കും. തുടര്‍ന്ന് വാര്‍ഡ്, ഓപ്പറേഷന്‍ തിയറ്റര്‍, ഐ.സി.യു എന്നിവ ഉള്‍പ്പെട്ട പ്രധാനകെട്ടിടത്തിന്റെ നിര്‍മാണം 2019 ജൂണില്‍ പൂര്‍ത്തിയാക്കുന്നതോടെ മെഡിക്കല്‍ കോളെജ് കെട്ടിട സമുച്ചയത്തിന്റെ നിര്‍മാണം പൂര്‍ണ്ണമാകും.പി.ഡബ്ള്‍.യൂ.ഡി കെട്ടിടവിഭാഗമാണ് നിര്‍മാണ പ്രവര്‍ത്തനം നടത്തുന്നത്. യോഗത്തില്‍ ഷാഫി പറമ്പില്‍ എം.എല്‍.എ, ഗവ.മെഡിക്കല്‍ കോളെജ് സ്പെഷ്ല്‍ ഓഫീസറും എസ് .സി എസ്. ടി വകുപ്പ് പ്രിന്‍സിപ്പല്‍ സെക്രട്ടറിയുമായ ഡോ.വേണു,മെഡിക്കല്‍ കോളെജ് വൈസ് പ്രിന്‍സിപ്പല്‍ ഡോ.എം.കെ രവീന്ദ്രന്‍ എന്നിവര്‍ പങ്കെടുത്തു.

മെഡിക്കല്‍ കോളെജ് വിദ്യാര്‍ഥികള്‍ക്കായി നാല് ദിവസം എട്ട് മുതല്‍ വൈകീട്ട് മൂന്ന് വരെ ഒ.പി നടത്താന്‍ തീരുമാനം

പാലക്കാട് ഗവ.മെഡിക്കല്‍ കോളെജ് വിദ്യാര്‍ഥികള്‍ക്കായി ജില്ലാ ആശുപത്രിയും ഗവ.മെഡിക്കല്‍ കോളെജും സംയുക്തമായി ആഴ്ച്ചയില്‍ നാല് ദിവസം നാല് യൂനിറ്റുകളായി വിഭജിച്ച് രാവിലെ എട്ട് മുതല്‍ വൈകീട്ട് മൂന്ന് വരെ ഒ.പി നടത്താന്‍ നിയമ-സാംസ്‌ക്കാരിക-പിന്നാക്കക്ഷേമ വകുപ്പ മന്ത്രി എ.കെ ബാലന്റെ അധ്യക്ഷതയില്‍ ചേര്‍ന്ന യോഗത്തില്‍ തീരുമാനമായി. പട്ടികജാതി വികസന വകുപ്പിന് കീഴിലുളള മെഡിക്കല്‍ കോളെജ് വിദ്യാര്‍ത്ഥികള്‍ ക്ലിനിക്കല്‍ വിഭാഗമായ ജില്ലാ ആശുപത്രിയില്‍ പ്രായോഗിക പരിശീലനത്തിന് കൂടുതല്‍ സൗകര്യം ഏര്‍പ്പെടുത്തണമെന്നാവശ്യപ്പെട്ട് നടത്തിയ സമരത്തെ തുടര്‍ന്നാണ് മന്ത്രിയുടെ അടിയന്തര ഇടപെടല്‍. എം.ബി.ബി.എസ് ബാച്ചുകളുടെ പഠനത്തിനായി ആഴ്ച്ചയില്‍ ഒരു ദിവസവും ഒന്നിടവിട്ട ശനിയാഴ്ച്ചകളിലുമായി നടന്നിരുന്ന ഒ.പി സൗകര്യം കൂടുതല്‍ ദിവസം സജ്ജമാക്കാനായിരുന്നു വിദ്യാര്‍ഥികളുടെ ആവശ്യം. വിവിധ മെഡിക്കല്‍ വിഭാഗങ്ങളായി വിഭജിച്ച് നടത്തുന്ന ഒ.പി മേല്‍നോട്ട ചുമതല ജില്ലാ ആശുപത്രി സൂപ്രണ്ടിനായിരിക്കും. ഇ.എന്‍.ടി വിഭാഗത്തില്‍ പഠനസൗകര്യത്തിനായി ജീവനക്കാരേയും ഉപകരണങ്ങളും ആരോഗ്യവകുപ്പ് സജ്ജമാക്കും. ജീവനക്കാര്‍ തികയാതെ വരുന്ന പക്ഷം ദേശീയ ആരോഗ്യദൗത്യവുമായി ബന്ധപ്പെട്ട് നിയമനം നടത്തും. ജില്ലാ ആശുപത്രിയിലെ അനസ്തേഷ്യ വിഭാഗത്തില്‍ അടിയന്തര സന്ദര്‍ഭങ്ങളില്‍ അനസ്തിസ്സ്റ്റിനെ ഗവ.മെഡിക്കല്‍ കോളെജ് ലഭ്യമാക്കണമെന്ന് മന്ത്രി നിര്‍ദ്ദേശിച്ചു. മെഡിക്കല്‍ കോളെജില്‍ നിലവില്‍ അഞ്ചും ജില്ലാ ആശുപത്രിയില്‍ മൂന്നും അനസ്തറ്റിസ്റ്റുകളാണ് ഉളളത്. പലപ്പോഴും ജില്ലാ ആശുപത്രിയില്‍ അനസ്തറ്റിസ്റ്റുകളുടെ കുറവ് അനുഭവപ്പെടുകയും രോഗികളെ മറ്റ് ആശുപത്രികളിലേക്കയക്കുകയും ചെയ്യേണ്ടി വരുന്ന സാഹചര്യത്തിലാണ് മന്ത്രിയുടെ സാന്നിധ്യത്തില്‍ തീരുമാനമുണ്ടായത്. ഗവ. മെഡിക്കല്‍ കോളെജുമായി ബന്ധപ്പെട്ട് സാങ്കേതികവും നിയമപരവുമായ വിവിധ പ്രശ്‌നങ്ങള്‍ സര്‍ക്കാര്‍ പരിഹരിച്ച് വരികയാണെന്നും കോളെജിന് മെഡിക്കല്‍ കൗണ്‍സില്‍ ഓഫ് ഇന്ത്യയുടെ അംഗീകാരത്തിനായി സര്‍ക്കാര്‍ ശ്രമിച്ചു വരികയാണെന്നും മന്ത്രി പറഞ്ഞു. അതുവഴി നിലവില്‍ പഠനം തുടരുന്ന കുട്ടികളുടെ പ്രവേശനം പരിരക്ഷിക്കുകയെന്ന കടമ കൂടി സര്‍ക്കാരിനുണ്ടെന്നും മന്ത്രി പറഞ്ഞു. പാലക്കാട് ഗവ.മെഡിക്കല്‍ കോളെജ് സൂപ്പര്‍ സ്പെഷാലിറ്റി സൗകര്യത്തോടെ മികച്ചതാക്കുകയാണ് സര്‍ക്കാര്‍ ലക്ഷ്യമെന്ന് മന്ത്രി അറിയിച്ചു. മെഡിക്കല്‍ കോളെജിന്റെ സുഗമമായ നടത്തിപ്പിന് ജില്ലാ ആശുപത്രി അധികൃതരും മെഡിക്കല്‍ കോളെജ് അധികൃതരുടേയും യോജിച്ചുളള പ്രവര്‍ത്തനം ആവശ്യമാണെന്നും മന്ത്രി വ്യക്തമാക്കി. യോഗത്തില്‍ ഷാഫി പറമ്പില്‍ എം.എല്‍.എ, ഗവ.മെഡിക്കല്‍ കോളെജ് സ്പെഷല്‍ ഓഫീസറും എസ് .സി എസ്. ടി വകുപ്പ് പ്രിന്‍സിപ്പല്‍ സെക്രട്ടറിയുമായ ഡോ.വേണു, ജില്ലാ ആശുപത്രി സൂപ്രണ്ട് ഡോ.രമാദേവി, ഡി.എം.ഒ ഡോ.കെ.പി റീത്ത, മെഡിക്കല്‍ കോളെജ് വൈസ് പ്രിന്‍സിപ്പല്‍ ഡോ.എം.കെ രവീന്ദ്രന്‍ എന്നിവര്‍ പങ്കെടുത്തു.

Story

സഞ്ചാരികളെ ആകർഷിച്ച്പാലക്കാട് കോട്ട. മഴചിന്തുകൾക്കിടയിൽകൊതിപ്പിക്കുന്ന സൗന്ദര്യമോടെ പച്ചപ്പും ജലസമൃദ്ധിയും

പാലക്കാട് : മഴയൊരുക്കിയ മനോഹര കാഴ്ചയിൽ പാലക്കാട് കോട്ടയും കിടങ്ങും സന്ദർശകരെ ആകർഷിക്കുകയാണ്. വരണ്ടു കിടന്നിരുന്ന കിടങ്ങിൽ വെള്ളം സുലഭമായതോടെ ഇവിടം ഹരിത കാഴ്ചയൊരുക്കുന്നു.കിടങ്ങ് പൂർണമായും നിറഞ്ഞുള്ള ജലസമൃദ്ധിയാണ് സഞ്ചാരികളുടെ മനം കവരുന്നത്. അടുത്ത കാലത്തൊന്നും കോട്ടയിലെ കിടങ്ങ് ഇത്രയധികം വെള്ളം കവിഞ്ഞിട്ടില്ല. വെള്ളം സമൃദ്ധമായ കിടങ്ങ് കാണാൻ ഇപ്പോൾ വൈകുന്നേരങ്ങളിൽ കൂടുതൽ സന്ദർശകർ എത്തുന്നുമുണ്ട്. പച്ചപ്പുൽപ്പരപ്പിനു തൊട്ട് താഴെപടവുകളുള്ള,ആഴമേറെയുള്ള കിടങ്ങ് വെള്ളത്താൽ നിറഞ്ഞത് സന്ദർശകർക്ക് നയാനന്ദ കാഴ്ചയായിരിക്കുകയാണ്. പാലക്കാട് നഗരമധ്യത്തില്‍ തന്നെയുള്ള ഈ കോട്ട ഉല്ലാസയാത്ര സംഘങ്ങളെ എന്ന പോലെ പ്രദേശവാസികളെയും ആകര്‍ഷിക്കുന്നു .മാമലകള്‍ കൊണ്ട് പ്രകൃതിയൊരുക്കിയ സംരക്ഷണത്തിന്‍റെ ചെറുരൂപമെന്നോണമാണ് ടിപ്പുവിന്‍റെ കോട്ട. ഈ കൊച്ചു പട്ടണത്തിന് സുരക്ഷാ കവചമൊരുക്കുന്ന കോട്ട ചരിത്രസ്മൃതികളുണർത്തുന്നതും, കരിമ്പനയുടെ നാടായ പാലക്കാടിന്പൈതൃകഅടയാളവുമാണ്. മലബാറിലേക്കും കൊച്ചിയിലേക്കും പടയോട്ടം നടത്തിയ മൈസൂര്‍ രാജാവ് ഹൈദരാലിയാണ് 1766ല്‍ ഈ കോട്ട നിര്‍മ്മിച്ചത്. പശ്ചിമ ഘട്ടത്തിന്‍റെ ഇരു വശങ്ങളിലും ആശയ വിനിമയ സൌകര്യം ഒരുക്കുക എന്നതായിരുന്നു ഈ കോട്ട നിര്‍മ്മിച്ചതിലൂടെ ഹൈദരാലി ലക്‌ഷ്യമിട്ടിരുന്നതെന്നാണ് വിശ്വസിക്കപ്പെടുന്നത്. സാധാരണഎപ്പോഴും സന്ദര്ശകരുള്ള ടിപ്പുസുൽത്താൻ കോട്ടയിൽ കർക്കിടക പെയ്ത്ത് തകർക്കുമ്പോഴും സന്ദർശകർക്ക് യാതൊരു കുറവുമില്ല. പരിസരം നന്നാക്കി സന്ദർശകരെ ആകർഷിക്കുവാന്‍ തക്കവിധത്തിൽ പുതിയ ക്രമീകരണങ്ങൾ നടത്തിയിട്ടുണ്ട്. സന്ധ്യാ നേരങ്ങളിൽ ഇഴ ജന്തുക്കളുടെ ശല്യമുള്ളതായി സന്ദർശകർ പറയുന്നു. കോട്ടക്കകത്തും പുറത്തും തെരുവ് വിളക്കുകൾ സ്ഥാപിക്കൽ, നടവഴി വീതി കൂട്ടൽ, അപകട സാധ്യതയുള്ളപാർശ്വഭാഗങ്ങൾ സംരക്ഷിക്കുക, കോട്ടയ്ക്കകത്ത് പാർക്കും ഇരിപ്പിടങ്ങളും വിപുലമാക്കുക തുടങ്ങിയവ ഇനിയും കാര്യക്ഷമമായിനടക്കേണ്ടതുണ്ട്.

Programms

Videos

mannarkkad pooram

chettivela live

mannarkkad pooram

chettivelaa live

mannarkkad pooram

chettivela live

mannarkkad pooram

mannarkkad ive